Йошкар-Олаште МОСИ-ште «Герои-земляки» воин чап тоштерым 23 сентябрьыште почмо. Тыгай пӧлем «Росмолодёжьын» (Молодёжьын пашаж шотышто федеральный агентствын) грантше кӱшеш ышталтын.
– Тымарте тоштерыш Йошкар-Оласе школлаште, колледж ден училищылаште тунемше 300 утла еҥ толын коштын. Нунылан тунемме тӧнежыште экскурсийым эртаренна, йодышыштлан вашештенна. Тоштерым ончалаш кумыл улмо годым мемнан деке йыҥгыртыза, а ме тыланда герой-землякна-влак нерген чумырымо материалым уло кумылын ончыктена, каласкалена», – каласыш образований шотышто проректор О.Е.Баланчук.
Тоштерыш пурен шогалмеке да шола велыш ончалмеке, Марий Эл гыч Совет Ушем Герой-влакын портретыштым ужына, а пурлаште – Российын куд геройжым. Тыгак тыште вич землякнан боевой корныж дене посна палдарыме, варарак материалым пойдараш шонат. Совет Ушем Герой Зинон Прохоров, Российын ХХ курымысо Геройжо-влак Валерий Иванов ден Марк Евтюхин, РФ-ын Геройжо Дамир Шаймарданов да Патырлык орденын кавалерже Богдан Бульченко нерген стендым ямдылыме, нунын арверыштым вераҥдыме.
Кодшо ийыште Российын Геройжо-влак радамна ешаралте: 9 декабрьыште марий пӧръеҥ, гвардий подполковник Сергей Иштугановлан «Йошкар шӱдыр» медальым кучыктымо. Ольга Евгеньевна лишыл жапыште тудын фотокартычкыже тышан вераҥдалтеш манын ӱшандарыш.
Кызыт МОСИ-ште тунемше рвезе-влак кокла гыч икмынярынже Украинысе специальный военный операцийыште улыт. Нунын кокла гыч иктыже – Богдан Бульченко – тушан 2022 ий 3 апрельыште вуйым пыштен. Йошкар-Олаште 1994 ий 2 декабрьыште шочшо Богдан 2013 ийыште Экономико-правовой гимназийым тунем пытарен. Вара МарГУ-шко пурен. Икымше курсым пытарымеке, срочный службышко каен. Тушеч толмеке, МОСИ-шке «Менеджмент» специализаций дене тунемаш тӱҥалын. Но икымше курс деч вара академический отпускым налын да службым эрташ контрактым подписатлен. Шке порысшым Сирийыште шуктен, варажым – Украинысе СВО-што.
– Российын Геройжо Дамир Шаймардановын аваж дене кылым кучена. Лачак тудо мыланна эргыжын арверже-влакым тоштерлан пуэн, – каласыш О.Е.Баланчук.
Шукерте огыл тоштерыште совет-финн сарлан пӧлеклалтше у стенд ден экспозиций ешаралтыныт. Тудо жапысе икмыняр арверым да тудын ужашыжым вераҥдыме. Тиде да моло теме денат МОСИ-ште да Столичный бизнес колледжыште (ик зданийыште кок тунемме тӧнеж верланен) тунемше-влаклан историй дене занятий-влакым тыште эртарат.
Тоштерым уэмдыме шотышто О.Е.Баланчук тыгерак каласыш: «Шкенан геройна ден выпускникна-влак нерген, илен-толын, презентацийым ямдылена. Тыгак чыла тидым интерактивно ончыкташ шонена, вет спецопераций шуйна, а илышыште у факт-влак ешаралтыт, тудым электрон йӧн дене ешараш сайрак лиеш».
Эльвира Терентьева.
Авторын фотожо-влак.