Таче Йошкар-Олаште лӱмлӧ семмастар, флейтист, Олык Ипай лӱмеш премийын лауреатше, РСФСР-ын да МАССР-ын сулло артистше Виталий Шапкин дене чеверласышна. Тудын ӱмыржӧ 14 февральыште кӱрылтын. Виталий Владимировичым шучко чер икмыняр ий орландарен.
Чапланыше маэстрона Шернур район Тумерсола ялыште шочын-кушкын. Виталий Владимирович Моско консерваторийым экстерн йӧн дене тунем пытарыме деч вара Йошкар-Оласе музыкальный театрыште оркестрын солистше лийын, флейте дене шоктен. Уста преподаватель семын шуко ий тыршен. Композитор Андрей Эшпай дене келшымыже да шке илышыж нергенат книгам возен коден.
Пытартыш жапыште черлан кӧра В.Шапкин ондакысе семын уло вийжым йӧратыме пашажлан пуэн кертын огыл, туге гынат «Унчышко тулан йолгорно» спектакльлан семым возен. Виталий Владимирович «Кугарня» газет редакций дене пеҥгыде кылым кучен. Коллектив лӱм дене ешыжлан, уло родо-тукымжылан чаманымашым каласена.
Иван Речкинын фотожо.