Кином ончаш йӧратыдыме еҥ укеат, очыни. А кунам кугу экраныште шке землякнам ужына, тиде эшеат куанле. «Путёвка в жизнь» икымше йӱкан совет художественный фильмыште Мустафан рольжым модшо марий актёр Йыван Кырлам (Кирилл Иванов) чылан палена.
У Торъял район Часамласола ялын шочшыжо, М.Шкетан лӱмеш драмтеатрын актёржо да режиссёржо Василий Домрачев «Особенности национальной рыбалки», «Меня зовут Арлекино», «Иди и смотри» фильмлаште модын. Ты театрынак актрисыже Светлана Строганова «Перегон» фильмыште сниматлалтын. Олег Тактаров Российысе веле огыл, Голливудысо фильмлаштат модын. Шернур районын шочшыжо Денис Шаблий нерген газет лаштыкыштына возенна. Шукерте огыл тудо «Как приручить богатыря» фильмын режиссёржо лийын, шкеак образымат чоҥен. Константин Хабенскийын аваже Йошкар-Ола гыч. Рвезе Йошкар-Оласе 11-ше №-ан лицейыште тунемын.
Ноябрьыште «Россия-1» канал дене «Стенограмма судьбы» сериалым ончыктышт. Тушто Звенигово район Чакмарий селаште шочын-кушшо, 32 ияш марий рвезе Василий Молодцов модо. Тачысе кечылан тудо 12 фильмыште сниматлалтын. А тӱҥ паша верже – Москосо «Студия.project» театр. Василий дене Интернет гоч мутланышна.
В.Молодцов фильмлаште 2014 ий годсек сниматлалтеш. Икымше рольжо – «Мент в законе» сериалыште подозреваемый Сергеев. Тылеч вара «Паутина-9» (Горшок), «Солнечный круг» (каратист), «Только на фото» (Вадим), «Бомба» (Киномеханик), «Склифосовский-8» (Дима), «Стенограмма судьбы» (Анатолий), «Историк» (Фофанов), «Спасская-2», «Воздух» фильмлаште сниматлалтын. 2022 ийыште «Мажор-4» фильм лекшаш, тушто Следственный отделын пашаеҥжым модеш. Тыгак «Колыбельная для Коломбины» фильмыште тӱҥ рольым модын. Но тиде – фестивальлык фильм, тудым телевизор дене огыт ончыкто.
– Спектакльыште да киношто модаш – иктак але тиде кок тӱрлӧ паша? Кудыжо утларак келша?
– Кино ден спектакль, мутат уке, ойыртемалтыт. Ончышо-влакат театрыштат, киноштат тӱрлӧ эмоцийым шижыт. Театрыште зрительым шижат да удовольствийым чотрак налат, тушто актёрын эрыкше шукырак, тидыже шуко репетироватлыме да зрительын шкем кузе кучымыж дене кылдалтын. Тидлан кӧра театрым утларак йӧратем. Киношто «стоп» команде дене удовольствий пыта, южгунамже нимом шижынат от шукто. Но киношто оксам утларак ыштен налаш лиеш.
– Йочат годым футболистат, артистат лиймет шуын. Молан вигак артистлан огыл, а МарГУ-шко экономике управлений дене педагоглан тунемаш каенат?
– Изиэм годым футболист гына лиймем шуын. Тиде эн кугу шонымашем ыле, но тудо шукталтын огыл. Вет селаштына футбол школ уке, а ала-кушко тренироватлалташ кудалышташ йӧн лийын огыл. Садлан тиде шонымаш иктаж-кунам шукталт кертеш манын, вуйышкат пурен огыл.
А актёр мастарлыкым школыштак ончыктенам, но актёр лияш чотак шонен омыл. Южгунам гына «а чапле лиеш ыле» манме шонымаш-влак вуйыш пуреныт дыр, но тиддеч моло огыл.
Шуко еҥын ситыдымашыже, а ялыште илыше-влакын поснак, – шке вийлан огына ӱшане. Шке шонымашна деч вожылына, молан манаш гын ялыште публичный профессий нерген шонаш намысынрак чучеш. А трук воштылаш тӱҥалыт, шот огеш лек гын, «ойлышым вет» манын каласат.
Мый завуч Ирина Васильевна Семеновалан чот тауштем. Тудо руш литератур дене «почмо» урок деч вара актёр мастарлыкем ужын да мылам каласен: «Вася, тыланет театральныйыш тунемаш пурыман». Тидым кызытат шарнем гын, тугеже тудын ойжо тунам мыйым шке виемлан ӱшанаш таратен. Школ деч вара МарГУ-ш тунемаш пуренам. А нылымше курсышто актёр лиймем шуын, но вес вере куснаш вараш кодынат маныныт.
– Пашам кенета вашталташ мо-гынат таратен дыр? Чоҥымо организаций гыч театрыш…
Умбакыже 24 декабрьысе газетыште лудса.Кевыт
