манеш сӱретче-керамист А.Шайдуллина.
Марий ӱдырамаш чынжымак пашаче манын, ятыр пример дене пеҥгыдемден возенна. Тачат тидымак Алевтина Шайдуллина (ӱдыр фамилийже Кузьминых) нерген ойлынем.
Тудын шочмо У Торъял кундемыштыже шуным «чака рок» маныт. Ты шомак В.М.Васильев-Ӱпымарийын возымаштыжат вашлиялтеш, а «чака» мут пеҥгыде манын кусаралтеш. Алевтина Шайдуллина чака рок дене сӧрал арверым ятыр ий ненча.
Изи Алян шонымашыже
Овалже ялын Аля лӱман ӱдыржым, моторын сӱретлышылан шотлен, Йошкар-Оласе музыкально-художественный школ-интернатыш налыныт. «Тунам, рӱдола гыч пашанам ончаш толмышт кечын, классыштына утларак сайын сӱретлыше-влак черланеныт але вес амаллан кӧра лийын огытыл, – воштылалын каласыш Алевтина. – Сандене мыйым ойырен налыныт».
Изи Аля тӱрлыжым шонкален: «Налыныт, тугеже тунем пытарыман», «Тиде мыйынлык огыл, вара вес профессийлан тунемам».
Тыгак шоныдымын-вучыдымын Моско областьыште Абрамцевысо художественно-промышленный училищыш каен да «Художествення роспись по керамике» отделенийыште тунемын. Мо оҥайже: тунемаш пурымо марте ӱдыр керамикын мом ончыктымыжым паленат огыл.
Студентке кумшо-нылымше курслаште гына декор да стилизаций тӱнялан кумылаҥын, ты пашаште юзо шӱлышым шижаш тӱҥалын. Пӱрымаш тудлан сымыктыш корным сӧрен улмаш. А ик жап гыч шуко пален налаш тыршыме койышыжо МарГУ-со «Историй» специальность дене шинчымашым келгемдаш наҥгаен, тудым 1997 ийыште заочно тунем лектын.
Тӱрлӧ паша – ятыр йӧн
А.Шайдуллина кажне гана тӱрлӧ деч тӱрлӧ арверым шочыкта. Тудын ик сӧрастарыме настаже весе деч иктаж-мо дене да ойыртемалтеш. Тыгодым тӱрлӧ техникым, чиям кучылтеш.
Керамике тӱняште кажне арверым шукташ посна ӱзгарым кычал муаш перна. Ондак Алевтина деч марий сынан керамикым келыштараш ятыр гана йодыныт. Тудо тунам шӱм-чонлан да тыгодымак чылалан келшыше настам мо дене да кузе ыштышашым пален огыл. А икана, телевизорым ончымыж годым, кидешыже «клик-клак» манме заколкым почын-тӱчын, заколко тугылт каен. Тудын полшымыж дене узорым келыштараш моткоч йӧнан улмым рашемден. Вет шунышто име дене корен кайыме годым шун нӧлталалтеш, пеш моторжак ок кой.
Алевтина Андреевнан мӧҥгыштыжӧ паша ӱстембалныже ятыр профессийлаште кучылтмо ӱзгар-влакым ужаш лиеш. Лачак нунын дене мастар керамист узор-влакым келыштара. «Тӱрлӧ арвер вашке печкалт сеҥа. Техникым гына пален налмеке, икте почеш весе шочыт. Ыштыме годым шонымашат шуко лектын шога – саде шонымашын почшым кучен гына шукто», – манеш уста еҥ.
Эн ончыч керамист арверым жгутовый манме йӧн дене ненчен – шуным шке кидше дене пӧрдыктен. А кызыт тӱрлӧ кугытан жгутым ышташ ӱзгар уло. Шолтымо кочкышым тыгыдемдыме решотка да ручкан пастыж денат пеледышым, сӧрал узорым шочыкташ лиеш. Адакшым стоматологын, кулинарын арверже-шамычат полшат. Чылажымат Алевтина Андреевна шке шонен кучылтеш. Варажым панно ден сӧрастарыме настаже-влакымат ончен куанет – эсогыл шинчамат кораҥдыме ок шу.
УМБАКЫЖЕ «КУГАРНЯ» газетын 2020 ийысе 50-ше (1616) номерыштыже лудаш темлена.
