Тӱрлӧ пакчасаскам, фруктым кучылтын, шӱргӧ коваштылан пайдале маскым ышташ лиеш.
Олма маскым ямдылаш пел олмам тёрко гоч нӱжыза. Тудым 20 минутлан шӱргыш йыгыза да юалге вӱд дене шӱалтыза.
Вичкыж мамык дискым але марльым арбуз сокышто нӧртыза да 20 минутлан шӱргышкыда пыштыза. Вара леве вӱд дене шӱргыдам шуалтыза.
Вичкыж коваштан еҥ-влаклан персик да кешыр гыч ямдылыме маске-влак полшат. Тидлан персикын кӧргыжым шӱрыман да 20 минутлан шӱргыш йыгыман. Олмам да кешырым тыгыде тёрко гоч нӱжыза, сайын варыза да 20 минутлан шӱргышкыда шӱрыза. Вара юалге вӱд дене шӱргыдам шӱалтыза.
Кукшо коваштан-влаклан виноград да банан гыч маске-влак пайдале улыт. Тидлан пурлмо виноградым але бананым шӱргышкыда, шӱйышкыда йыгыза. Тылеч вара коваште вичкыж плёнко дене петырналтеш. Тудым 20 минут гыч мушса.
Коя коваштан-влаклан кияр да мӧрӧ сайын полшат. Ару коваштыш тыртышын пӱчкедыме киярым пыштыза. 20 минут наре кучымеке, юалге вӱд дене шӱалтыза. Икмыняр мӧрым сайын шурыза да 20 минутлан шӱргышкыда йыгыза.