Мый изи ялыште шочын-кушкынам. Ача-авамын суртышт шӱгарла ваштареш верланен. Шӱгарлан пел могыржо колышо-влак дене темше лийын гын, вес пел могырыштыжо ялысе калык кеҥежым шудым солен. Мыланна, тушто илыше еҥ-влаклан, нимо удам ыштымыла чучын огыл. Шӱгарла гоч вес яллашке лекташ вик корнымат тошкенна. Йӱдымат тудын гоч лӱдде эртен кертынна. Пошкудо яллаште илыше йолташ ӱдыр-влак тидлан эреак ӧрыныт, огыда лӱд мо манын, икмыняр гана йодыныт. Тидланже: «колышо деч огыл, а илыше деч лӱдман» манын вашештенна. Южгунамже, нуным лӱдыкташ шонен, колышо-влак нерген шонен лукмо тӱрлӧ историйым каласкаленна. Тыге ыштымынам пален налмек, авам мыйым вурсен, тетла тыгай историй-влакым ида ойлышт, колышо-влакым кӱлеш-оккӱл мутланымаш дене витараш сай огыл манын.
Шӱгарлан пел могыр кумдыкыштыжо шудым солымо нергенат таклан огыл ойлышым. Такшым тушто еҥ-влак шудым ик ганат шот дене поген кертын огытыл: тудым эреак йӱр нӧртен. Але солымо деч вара йӱр чӱчкыдын арня але утларакат оптен. Тыге шудо вольыклан пукшаш йӧрдымыш савырнен. Кажне ийын тыге лийын гынат, еҥ-влак садак шудым соленыт. Кугу лиймекем, тидын нерген шонкалаш тӱҥалынам. Молан лачшым тушто шудым солымо годым эре йӱр оптен? Ала тоштыеҥ-влак тидлан тореш лийыныт?
Галина Р.
У Торъял район.