АВТОР — Любовь МИХАЙЛОВА.
2023 ий Буймо селаште илыше-влаклан тӱрлӧ событийлан поян лийын. Тидыже Буймо ял шотан илем администрацийым вуйлатыше Э.Михайловын еҥ-влакын погынымаштышт лудмо отчёт докладше гыч раш шижалте. Погынымаште район вуйлатыше Ленар Нургаянов ден Татарстан Республикын Госсоветшын депутатше Айрат Зарипов лийыныт.
Ӱмаште Пелемеш ялыште Семык пайрем кумдан эртаралтын. Пайремлан ямдылалтмашке ял шотан илемысе уло калык ушнен. Воктенысе яллаште илыше-влакат полшеныт. Татарстанын Раисше Рустам Минниханов пайремыш толын ыле да мероприятийым кӱкшын аклен, тӱвыра пашаеҥ—влаклан автобусым пӧлеклен.
Тыгак ӱмашет Пелемеш администрацийлан у оралтым чоҥымо, Пелемеш клубым да Буймо школын пищеблокшым капитально олмыктымо.
Ял калыкат кундемым тӱзатымаште чот тырша, тидлан оксам погат, Буймышто 1000 теҥге дене погеныт, Пелемеш ден Мадыкыште – 500 теҥге дене. Садлан тыге шагал огыл сомылым вораҥдарыме. Корным да ялласе кумдыкым шотыш кондымо, уремым волгалтарыме да вӱдпучым шушмо деч посна Буймышто ялысе мероприятий-влакым эртараш пайрем площадкым келыштарыме.
Пытартышлан вуйлатыше-влак 60 ий пырля илыше Ижболдинмытым саламленыт. Анатолий Ишаевич ӱмыржӧ мучко экономистлан ыштен, Надежда Изибаевна – туныктышылан. Вате-марий вич йочам ончен куштеныт.
Татарстан кундем.