Боксёрко, самбистке…

 

 

Таче ме Шернур посёлкышто шочын-кушшо да конкурсышто «Талантын миссше» лӱмым сулышо марий ӱдыр дене палымым ыштена.

Мария Казакова МарГУ-што физический культур, спорт да туризм факультетын икымше курсыштыжо тунемеш. «Илышыштем спорт кугу верым налеш, тренировко ден физически шуаралтмаш деч посна иленжат ом керт», – манеш тудо.

 Маша Шернур посёлкысо 2-шо №-ан школышто тунеммыж годым районысо таҥасымашлашке да «Служу Отечеству» военно-патриотический клубыш, ятыр слётыш коштын. Тӱрлӧ номинацийыште ӱдыр-влак коклаште сеҥышыш лектеден. Тудо шке вийжым куштылго атлетике, спорт ориентированийыште терген, тӱрлӧ вере сборышто лийын.

Мария школ годсек волейболыш да боксыш коштеш. «2017 ийыште школыштына «Бокс» секцийыш погымо нерген уверым ужынам да вес кечынжак тренировкыш каенам. Рвезе-влак дене спаррингыште шогенам. Эн ончыч секцийыште ме куд ӱдыр улына ыле, но вара шкетын гына кодынам. 2018 ийыште Шернур район деч мылам чолга улмемлан Российысе «Смена» йоча рӱдерыш (Анапыште верланен) путёвкым пуэныт ыле. Тушто «Самбо» секцийым ойырен налынам, а смене мучаште мылам «Готов к труду и бороне» шӧртньӧ значокым пуэныт. Йошкар-Олаштат бокс дене ӱдыр-влакын заниматлыме верыштым муынам, кызытат тушко коштам», – ойла студентке.

Кум кеҥеж Мария Марий Элысе лагерьлаште вожатыйлан пашам ыштен. Тылеч посна Шернур районысо да Анапысе Добровольчестве рӱдерын волонтёржылан шотлалтеш.

Чолга да тыршыше ӱдыр «Хореографий» направлений дене йоча сымыктыш школым тунем пытарен. Тунамак школысо «Грация» ансамбльыште куштен. Машалан сценыште выступатлаш путырак келша. Куштымо деч посна республикысе лудмо конкурсла гычат ятыр грамот дене пӧртылын.

Ӱдыр эре шинчымашым келгемдаш шонымашыж дене «Роза ветров» йоча да самырык-влаклан рӱдерыште Экскурсовод-влакын школыштым тунем лектын. Кодшо ийын тудлан чолган пашам шуктымыжлан Санкт-Петербург олам ончен лекташ путёвкым кучыктеныт.

Мария «Драйв, шыргыжмаш, позитив эре пеленем улыт» девиз дене ила. Нине шомак-влак чынжымак ятыр сеҥымашыш шуаш полшат.

Эльвира Терентьева.

И.Речкинын фотожо.