28 февральыште Йошкар-Олаште бокс дене тӱнямбал турнир лиеш. Организаторжо – Марий Эл Правительстве да тудым Вуйлатыше Юрий Зайцев.
Лӱмлӧ спортсмен-влак кучедалыт
Турнир вашеш Йошкар-Олаште икмыняр мероприятий эртаралтын. Тушко кумдан палыме боксёр Рой Джонс, Кевин Джонсон, Олег Саитов ушненыт. Тыгак бокс дене профессионал матч-влакым организоватлыше Владимир Хрюнов лийын. Боксёр-влак спортсмен да журналист-шамычын йодышыштлан пресс-конференцийыште вашештеныт. А тиддеч ик кече ончыч Йошкар-Оласе 1-ше номеран ФОК-ышто самырык боксёр-шамычлан мастер-классым эртареныт. Тушко Марий Элым Вуйлатыше Ю.Зайцев, тренер-преподаватель, спортсмен да боксым йӧратыше-влакат ушненыт.
– Тыгай мероприятий ончыкылык чемпион-влакым сеҥымашке шуаш кумылаҥдаш полша. Бокс тиде спорт веле огыл, тудо илышын школжо. Тидлан кӧра айдеме уш да капкыл дене вияҥеш, койыш-шоктыш пеҥгыдемеш, тӱрлӧ нелылыкым сеҥаш тунемеш. Тидыже эллан чын патриот-влакым кушташ полша, – палемден Ю.Зайцев.
Марий Эл унам ончен моштымыж дене эреак ойыртемалтын. Мероприятийым мучашлыме деч ончыч Юрий Викторович регион лӱм дене чапланыше боксёр-шамычлан пӧлекым кучыктен. Тыгак 28 февральыште кундемыштына бокс дене тӱнямбал кӱкшытан турнир эртаралташ тӱҥалме нерген ушештарен. Рингыш палыме боксёр-влак Сергей Кузьмин ден Эбенезер Тетте лектыт. Тыгайже эше Марий Элыште лийын огыл.
Марий шӱлыш – вӱрыштӧ
Олег Элекпаевич Саитовын ачаже – марий. Тидын нерген тудо уна-влаклан кугешнен ойлыш. Олимпийский чемпион Марий Элыште эртаралтше бокс дене кугу таҥасымашлашке толаш эреак тырша. Тудым тыште чон почын да порын вашлиймышт нергенат палемдыш. Марий мландыште бокс вияҥмылан да тушко ятыр самырык рвезе ушнаш кумылаҥмылан йывыртымыжым ыш шылте.
О.Саитов боксыш кандаш ияшыж годымак толын. Коло утла ий ты спорт дене заниматлен. Тудын ачаже Элекпай Ахметгареевич тӱрлӧ кучедалмаште шке семын шуаралтын, изаже – бокс дене СССР-ын спорт мастерже, эргыже-шамычат спортын ты видыштыже шуаралтыт. Олимпийский модмашын пьедесталыштыже Саитов кум гана лийын: кок гана – чемпион, ик гана – призёр. Эн техничный боксёр семын В.Баркер лӱмеш кубокын озаже.
Ик бойым ончен, тудын тӱнжым умылен
Рой Джонс участник-шамыч дене кусарыше гоч мутланен. Бокс – тиде тудын тӱрыс илышыже манын палемден. Боксёрын каласкалымыж гыч:
– Кажне кредалмаш деч ончыч илыш верч кучедалше, неле чер дене орланыше еҥ-влак деке лекташ тыршем. Тидыже мыланем шкешотан вийым пуа да ончыкылыклан ӱшаным шочыкта. 1974 ийыште карьерым чоҥаш тӱҥалынам. Мыйын ачам боксёр-влакым тренироватлен. Икана пӧлемышкыже пурымем годым тудо Мохаммед Алин кредалмыжым ончен шинчен. Мыят тудын деке ушненам. Тудо бой тыглай лийын огыл. Лач тунам ты кучедалмашын тӱҥжым – шонымашыжым – умыленам. Садлан мыйымат иктаж-кӧ боксироватлаш туныктыжо ыле манын шоналтенам. Тидлан чыла ышташ ямде, сеҥымашке шуаш тыршыше лияш товатленам.
Спортсмен товатлымыжым шуктен манын, пеҥгыдын каласаш лиеш. Тӱнямбал чемпион лӱмым сулаш ныл тӱрлӧ нелытан категорийыште 22 боксёрым сеҥен. 1990-ше ийлаште Джонсым «Луымшо идалыкын боксёржо» (Боксёр десятилетия) маныныт. Тудо эн тале боксёр-влак рейтингыште икымше лийын. Тӱрлӧ нелытан категорийыште чемпионжын титул верч сеҥымаште рекордсменлан шотлалтеш. Боксын историйыштыже Р.Джонс –тӱнямбал чемпион лӱмым ныл тӱрлӧ нелытан категорийыштат налше икымше спортсмен.
18 ияш толын
Кевин Джонсон – профессионал боксёр, гейткипер, кугурак нелытан категорийыште кучедалеш. Боксыш 18 ияш улмыж годым толын, 2002 ийыште профессионал рингыште дебютироватлен. Тачысе кечылан 60 бойым профессионально эртарен, тушеч 36 ганаже сеҥен.
М.Скобелевын фотожо-влак.