Декабрь кыдалне Медведево посёлкысо «Витязь» ФОК-ышто СССР-н спорт мастерже Эрик Якаевын призше верч бокс дене регион-влак кокласе турнир кумшо гана кумдан эртаралте. Тушко пошкудо регионла гыч шӱдӧ наре участник ушнен.
Пайрем шӱлышан турнир
Турнир пайрем шӱлышан ыле. Пошкудо регионла гыч толшо участник-влакым сылне муро да куштымаш дене вашлийыныт. Параньга район Осиял ялын шочшыжо, Марий АССР-ын бокс дене ятыр гана чемпион лӱмым сулышо, СССР-ын спорт мастерже, кундемыштына спортын ты видшым кӱшкӧ нӧлтымаште кугу надырым пыштыше Эрик Якаевын призше верч турнирым шукерте огыл эртараш тӱҥалме. Тудым ыштымаште лӱмлӧ спортсменын тунемшыже-шамыч тыршеныт.
– Шукыж годым айдемын ты илыш гыч кайымыж деч вара, тудын нерген ынышт мондо манын, иктаж-мом эртараш кумылаҥыт. А ме Эрик Николаевич илымыж годымак тудым пагалымым, аклымым да йӧратымым шижше манын, турнирым эртараш шонен пыштенна, – мутланымашке ушныш боксёрын Максим эргыже.
– Икымше турнир Йошкар-Оласе Юбилейный спорткомплексыште кум ий ончыч лийын. Кажне гана ты таҥасымашышке Юл кундем федеральный округыш пурышо регионла гыч ушнат. Турнирым пайрем шӱлышаным эртараш шоненна. Садланак тушко верысе артист, вӱдышӧ-шамычым шӱденна. Участник-влаклан Эрик Николаевич нерген видеофильмым ямдыленна. Тушто тудын спорт илышыж нерген тӱрыснек каласкаленна. Тыгак еш, самырык годсо жапше да тудын илышыж дене кылдалтше икмыняр фактым ончыктенна.
Тидын дене рвезе-влакым таза илыш-йӱлам кучаш, спорт дене кылым кучаш кумылаҥдаш шоненна. Вет Эрик Николаевич шкежат изи годсек спортын тӱрлӧ видыштыже шуаралтын. Куштылго атлетике, ече, многоборье дене заниматлен. Изиж годым кидышкыже бокс нерген книга логалмеке, тале боксёр лияш шонен пыштен. Ты книга почеш шке семынже мушкындылаш, капкылым чын кучаш тунемын. Варажым аваже тудлан боксёрский перчаткым налын пуэн, – каласкалыш Максим Эрикович.
Ик ийыште кӱкшӧ лектышым ончыктен
Эрик Якаев шонымашкыже шуын. Верысе Матародо кыдалаш школым тунем пытарыме деч вара Н.К.Крупская лӱмеш Марий пединститутын физкультурный факультетышкыже тунемаш пурен. Йошкар-Оласе «Трудовые резервы» тӱшкаште бокс дене шуаралташ тӱҥалын. Икымше тренерже – Г.М.Баранов. Тунам тудо Эрик Якаевлан ойлен: «Тыйын поездет шукертак ончыко кудалын. Иктаж-могай лектышым вучет гын, шке ӧрдыжлуетлан эҥерташ тунем». Ик ий гыч Якаев икымше кугыеҥ разрядлан нормативым шуктен, Марий АССР-ын чемпионжо лӱмым сулен. Тидыже Марий Элысе сборный командышкыже ушнаш корным почын. Эше ик ий гыч тудо спорт мастерыш кандидат нормативым шуктен.
Варажым Афганистаныште службым эртен. Туштат боксёр йӧратыме спортшо нерген монден огыл. Йӧн лекме семын эреак тренироватлалташ тыршен. 1982 ийыште армий гыч пӧртылын. Идалык гыч Фрунзе олаште спорт мастер лӱмым сулен. «Трудовые резервы» Российысе ушемын сборный командыжын ик еҥже лийын. 1987 ий марте ты ушем верч кредалын. Эрик Николаевич 71 килограмм нелытан-влак коклаште таҥасен. Кугурак-шамычлан эртаралтше рингыште 108 бойым вӱден. Тушеч 91 ганаже сеҥышыш лектын. Э.Якаевым суапле пашам шуктымыжлан, республикыштына боксым нӧлтымаште кугу надырым пыштымыжлан 1999 ийыште «Марий Элысе физкультурын сулло пашаеҥже» лӱм дене палемденыт.
Ачаштын кышаж дене
Эрик Николаевичын Максим ден Константин эргыже-влак боксыш изи улмышт годымак толыныт.
– Вич-куд ияш улмем годым ачам дене пырля тренировкыш коштынам. Тунам йочалан вет чылажат оҥайын чучын. Тӱҥжӧ – жапым веселан эртараш. Лу ийым темымеке, ачам пеҥгыдынрак йодаш тӱҥалын. Тыге шке декат йодмаш кушкын. Спортсмен семын вияҥаш, сай результатым ончыкташ тыршенам. Ачам семынак физкультурым туныктышылан тунем лектынам. Кызыт йоча-шамычым бокс секцийыште шуарем. Константин шольымат ик жап бокс дене заниматлен. Сай лектыш дене куандарен. Юниор-влак коклаште Юл кундем округысо первенствын чемпионжо лӱмымат сулен. Российын сборный командышкыжат ойыралтын. Варажым ик татыште шонымашыже вашталтын да футболыш куснен, – каласкалыш Максим.
Максим Якаевын лӱмжат ты спорт дене чак кылдалтын. Тудо бокс дене Российын спорт мастерже лӱмым самырык улмыж годымак пеҥгыдемден. Рингыште 185 бойым вӱден, тушечы 165 ганаже сеҥышыш лектын.
Бокс моло спорт гаяк чытышым, тазалыкым, пашаче кумылым йӧрата. Садлан пьедесталыш лачшымак тыгай койышан-шамыч логалыт. Тидыжым Якаевмыт пеҥгыдемдат.
М.Якаевын альбомжо гыч налме фото.