1-2 октябрьыште Москошто технологический предпринимательстве да инноваций шотышто Moscow Startup Summit тӱнямбал саммит эртаралтын. Мероприятий СберСити-се «Школа 21» кампусышто лийын. Тушто 60 сессийыште 150 утла эксперт выступатлен.
Саммитыш Марий Элым Вуйлатыше Юрий Зайцев ушнен. Тудо почмаште лийын, экспозицийым ончен лектын да участник-влак дене мутланен.
Регионым вуйлатышын мутшо почеш, ты саммитыште эн сай практик-влакын опытыштым да Марий Элыште инновацийым вияҥдаш ончыкылык шонымаш-влакым пален налаш лиеш. Сбер дене пырля республикыштына образованийыште да медициныште кӱкшӧ технологий шыҥдаралтеш. Юрий Зайцев тиде опытым шукемдаш да кундемнам социально-экономически вияҥдаш моло рӱдӧ сферылаштат инвестицийым кондаш кӱлеш манын.
Саммитын программыже вич трек гыч шоген: «ИИ да бизнес», «Стартап», «Инвестиций», «Корпораций да кугыжаныш», «Практикум». 1 октябрьыште Sber500 тӱнямбал акселераторын кечыже эртаралтын, а 2 октябрьыште – Россий, Белоруссий да Китай гыч команде-влакын участвоватлымышт дене молодёжный технологический стартап кече.
А саммит мучаште Моско правительстве ден Сберын технологический премийжым кучыктеныт. Сеҥыше-влакым 17 номинацийыште палемденыт.