19 декабрьыште Марий Эл Правительстве Председательын алмаштышыже Д.Троицкийын темлымыж почеш Антикризисный рӱдерыште «йыргешке ӱстел» эртаралтын.
Тушко кучемын регионысо органже-влак, паша ушем, предпринимательствылан полышым пуышо институт ден бизнес-актив-влак ушненыт. Толшо-влак 2023 ийыште ыштыме пашам иктешленыт да вес ийлан планым рашемденыт. Тыгак промышленностьым да торговльым, ялозанлыкым да чоҥымо пашам, чодыра комплекс ден туризмым ончыкыжым эшеат вияҥден колтымо нерген ойленыт.
– Экономикылан полышым ойырымылан да организаций-шамыч дене пеҥгыде кылым кучымылан кӧра экономикын тӱрлӧ аланже вияҥмым палемдыман. Тений, мутлан, промышленный продукций 19,5 процентлан кушкын, ялозанлык – 0,7 процентлан, чоҥымо паша – 13,3 процентлан, розничный торговльо оборот – 4,9 процентлан, бюджетын доходшо – 13,3 процентлан. Национальный проект-влак тидын шотышто кугу полышым пуат. Изирак да кыдалаш бизнеслан полшымылан кӧра «Мой бизнес» рӱдер тений чылаже 1,1 млрд наре теҥгеаш 244 микрозаймым да 164 поручительствым ойырен. Социальный предприятий да 25 ияш деч самырыкрак предприниматель-влаклан 10,7 млн наре теҥгеаш 31 грантым ойырымо, – ойлен Марий Элысе промышленность, экономике вияҥмаш да торговльо министр С.Крылов.