Морко район Унчо селаште шочын-кушшо Наталья Иванова кидпашалан изинек шӱман. Изирак класслаште тунеммыж годым бисер дене тӱрлӧ мотор браслетым, шергашым ыштен да йолташыже-влаклан пӧлеклен. Вара крючок да спице дене пидаш тунемын. Шарфым, упшым, свитерым, жакетым, тувырым пидын. Ырес денат тӱрлен ончен. Куэмыш пеледышым, янлыкым келыштарен. Тӱрлымӧ ик эн кугу да сӧрал пашажлан Наталья пеледышан кӱпчыкшӱргым шотла.
– Авам почтышто пашам ыштен. Мӧҥгӧ тӱрлӧ журналым конда ыле. Мыланем пидаш туныктымо схеман журнал-влак утларак келшеныт. Эн чот «Валя-Валентина» журналым йӧратенам, шукыж годым тушеч ончен пидынам. Иктаж-мом ом умыло але ом мошто гын, авам эре полшен. Тудак мыйым пидаш шӱмаҥден. Яра жапше годым авам эре кидпашам кучен шинчеш ыле. Кызытат свитерым, жилеткым, кардиганым, пижым, носким, тапочкым пидеш, – каласкала Наталья.
Н.Иванова ешыж дене Сургут олаште ила. Тудо изинек туныктышо лияш шонен, садлан МарГУ-што марий ден англичан йылме-влакым туныктышо специальностьым налын. Вара тӱҥалтыш класслам туныктышылан тунемын да тора кундемыш пашам ышташ каен. Кызыт Наталья йоча дене шинча. Декретыште улмыж годымак бисер дене сӧрастарыш-влакым ышташ тӱҥалын.
– Интернетыште шке ямдылыме мотор брошко-влакым ужынам ыле. Мыят тыгайым ыштынем манын шоналтенам да мо кӱлешым наледенам. Икымше тыгай пашам – лимон. Но тудо сайжак лектын огыл. Туге гынат тиде кидпашам кудалтен омыл. Эшеат чот тыршенам, да кажне гана моторрак лектын. Тидлан туныктымо ятыр видеом онченам. Утларакшым брошкым ямдылем – бисер дене тӱрлен шинчаш келша. Эше алгам, чокерым, кидшолым ыштем, – манеш самырык ава.
Кидпашам Наталья йочажын малымыж годым ышта. Но тидлан кумыл лийшаш. Уке гын лектыш чоным ок куандаре. Шке ямдылыме сӧрастарыш-влакым, фотош войзен, Н.Иванова интернетысе соцкыл лаштыкышкыже луктеда. Мотор ӱзгарым налаш кумылан-шамычат лектыт.
– Мыланем кидпашам ыштен шинчыме процессшак келша. Кечыгутат шинчылт кертам. Эше лӱмын трикотажный шӱртӧ дене сумка ден корзиҥга-шамычым пидам. Тидымат интернетыште ончен тунемынам. Кажне сӧрастарыше ӱзгарым але вес кидпашам чоным пыштен ыштем, моторын да чаткан ямдылаш тыршем, – ойла Наталья.
Марий Элыш Натальямыт утларакшым кеҥежым толыт, ялыште ятыр жапым эртараш тыршат. Шочмо кундемыште чон кана, ончыкылык пашалан вий-куат погына.
Н.Иванован альбомжо гыч налме фото-влак.