Инвалид-колясочник-влак междугородний поездлаш лӱмын келыштарыме верлаш билетым онлайн налын кертыт.
Инвалид-влакын федеральный реестрышт (ФРИ) гыч данныйым «Российысе кӱртньыгорно» (РЖД) системыш Пенсий фонд ӱмаште декабрьыште колтен. Тидлан кӧра инвалид-влак льготан билетым онлайн налын кертыт. Ондак транспорт компанийын кассылаштыже инвалид улмым пеҥгыдемдыше справке почеш веле ужаленыт. Реестрыште данный эре уэмдалтеш, садлан айдемылан инвалидностьшым пеҥгыдемдыме огеш кӱл.
Каласыман, кызыт реестрысе данныйым инвалид-влакым обслуживатлыше чыла кугыжаныш ведомство-влак кучылтыт. Калыклан паша верым ситарыме рӱдер, мутлан, реестрысе данныйлан инвалид-влакын профессиональный реабилитацийышт годым эҥерта. Тыгак нунылан пашам муаш полша. 2020 ий июль гыч инвалид-влаклан льготан парковко шотышто федеральный базе семынат кучылталтеш.
Кызыт инвалидность шотышто чыла пенсийым реестрысе данныйым кучылтын оформитлат да шуят.