«ВУЧЫМО СЕҤЫМАШ» КОНКУРСЫШ ПУРЫШО ПАША
Тошкенам лаштыртен
пыжашешше тушманым,
Шырпыла шалатен,
пытарен коденам.
Тыге возен ик почеламутыштыжо марий поэт Макс Майн. Лач тыге ойлен кертеш ыле мыйынат кугезе кочам. Васлий лӱм дене тудым Ӱлылсола ялыште паленыт. Тале, пашаче, поро кумылан, еҥлан эре полшаш ямде.
– Еҥлан порым ыштет – тыланет порыжо шӱдӧ пачаш кугемын толеш, – манын.
1941 ий. Рушарня. 22 июнь. Марий областьым ыштымылан 20 ий темме пайремым эртараш Ӱлылсола ял калык ыш келше. «Паша шыгыр. Вара яра жап лийме годым эртарена», – маньыч. Чынак, ялыште эре паша: кеҥежым, телым, пайрем годым, рушарнянат.
Таче-эрла тӱредаш лекман. Ӱзгарым ямдылыман. Уржасорла тӱҥалеш гын, кажне ик минутшо шерге деч шерге. Васлий кугезе кочамат пашаш лектын ошкылын. Кечываллан толмо годым ала-молан чаҥ йӱк шоктен. «Пожарак огыл дыр», – шоналтен. Шке семынже Юмыланат пелештен.
Погынымо верыш чумыргышо еҥ-влак шке коклаштышт мутланеныт, чыланат мо лиймым палаш шоненыт. Председатель лектын, погынышо-влакым ончалын, вара пелештен: «Пошкудо-влак, сар тӱҥалын. Фашист Германий мемнан эл ӱмбак керылтын». А Морко гыч толшо военный вургеман еҥ манын: «Нине еҥ-влак кызытак Моркышко каеда. Тушманым кыраш. Мо кӱлешым налза. Тыланда ик шагат жап».
Тыге кугезе кочамат Василий Сергеевич Краснов тушман ваштареш кредалаш каен. Берлин марте шуын. Лач майыште йот мландеш йомын. Тудо сеҥалтдыме лийын, чыла неле-йӧсым чытен. Сеҥымашым конден. Тыглай марий салтаклан курымаш чап лийже.
Александр ИВАНОВ, 5«б» класс.
Морко район, Коркатово лицей.