2020 ийын кокымшо пелийжылан «Кугарня» газетлан возалтше-влак коклаште лотерей модышым эртаренна ыле. Тӱҥ призым – бензосавам – У Торъял район Какшанмучаш селаште илыше А.И.Яштуганов модын налын.
Тиде – Алексей Иосифовичын мемнан лотерейыштына модын налме кумшо призше. Икымше гана кассет, кокымшо гана чукыр-влак логалыныт улмаш. «Мый газетым лекташ тӱҥалмыж годсек йӧратен лудам, поснак «Изи тӱня, кугу тӱня…» лаштык келша», – каласыш лудшына.
Алексей Иосифович Морко район Кугу Вараҥыж ялыште 1953 ийыште шочын. 1986 ийыште йолташыже У Торъял район Какшанмучаш селаш илаш куснен. А.Яштуганов тудын деке унала миен, вершӧрым ончалын. Чонжылан ты вер келшен, сандене 1991 ийыште шкежат ешыж дене тышке илаш куснен. Ятыр ий «40-лет Октября» колхозышто пашам ыштен. Кызыт сулен налме канышыште.
Яра жапыште саскам, поҥгым погаш йӧрата. Ондак олашкат ужалаш коштын. Тений погымо саскаж дене 50 литр вареньым шкак шолтен. Кечеш 3-5 литр мӧрым, снегым пога. «Мый сакырым ом коч, сандене ик литр вареньым пелашем дене арня жапыште чай дене подылын кочкына»,– ойлыш А.Яштуганов.
Алексей Иосифович пелашыж дене ныл йочам ончен куштеныт: кум ӱдырым да ик эргым.
«Бензосавам модын налмеке, чот куаненам. Икшыве-влаклан вигак йыҥгыртен каласышым. Ты гана квитанцийым варашрак колтенам. Пошкудем мый дечем ончычрак колтен шуктен. Вара мыйым ужын да колтенат уке манын йодо. «Колтенам» маньым. Тӱҥ призымак модын налаш шонымем дене палдарышым. Юмын колыштмо шагатше лийын, очыни. Ты савам Озаҥ олаште илыше ӱдыремлан колтем. Дачыштыже шудо солаш лачак келша», – каласыш сеҥыше.