Ак шотышто
Тений Марий Элыште апрельыште март дене таҥастарымаште автомашиналан бензин 0,2%-лан кушкын, идалык тӱҥалтыш гыч – 3,5%-лан.
Дизель топливе ик тылзыште 0,1%-лан шергештын, идалык тӱҥалтыш гыч – 1,3%-лан. Газовый моторный топливылан ак апрельыште 1,4%-лан иземын, вет идалык тӱҥалтыш гыч тудо эсогыл 14,7 %-лан кушкын.
Республикыштына апрельыште кокла шот дене тыгай ак лийын: АИ-92 бензинлан – 44,25 теҥге, АИ-95 маркан – 47,32 теҥге, АИ-98 – 54,25 теҥге, дизель топливе – 47,36 теҥге, газовый моторный топливе – 27,21 теҥге.
Юл кундемысе регион-влак коклаште эн шерге бензин Киров областьыште лийын, АИ-98 маркан бензин ден дизель топливе – Пермь крайыште. А Саратов областьыште газым эн шергын да АИ-92 маркан бензиным эн шулдын налыт. Башкортостаныште АИ-95 бензин эн шулдо – 46,94 теҥге, Мордовийыште – АИ-98 (52,74 теҥге), Угарман кундемыште – газ (24,95 теҥге). А Марий Элыште апрельыште эн шулдо дизель топливе лийын – ик литрлан 47,36 теҥгем тӱленыт.