Эртыше кечылаште Марий Эл Республик ден Беларусь коклаште торгово-экономический, научно-технический, тӱвыра да гуманитарный кылым ыштыме шотышто паша группын заседанийже эртен.
Тушко Марий Элым Вуйлатыше Ю.Зайцев, Беларусь Республикын ЖКХ министрже Г.Трубило, тыгак кок республикын министерстве ден ведомство-влакын вуйлатышышт ушненыт.
Ю.Зайцевын палемдымыж почеш, ЖКХ, агромпромышленный комплекс, ужалыме аланлаште кылым кучымо поснак кӱлешан. Тӱвыра ден образований алан-влакымат палемдыде ок лий. Кажне ийын 2 апрельыште, мутлан, Беларусьысо да Российысе калык-влакын икоян улмыштлан пӧлеклалтше «В крепкой дружбе наша сила» самырык-шамычлан акций эртаралеш.
Заседаний годым Беларусь гыч Марий Элысе ЖКХ организаций-влаклан кӱлеш специализированный техникым, лифт оборудованийым кондымо нергенат ойленыт. Ончыкыжым Марий Эл Правительстве «Троллейбусный транспорт» муниципальный предприятийлан 45 троллейбусым кондаш палемден. Марий Элысе озанлыклаш нӧшмым, ветеринарный препаратым, кормовой добавкым шупшыктымо нергеат ойленыт.
Вашлиймаште Беларусь ден Марий Эл Республиклан Правительствышт коклаште 2024-2026 ий-влаклан торгово-экономический, научно-технический да тӱвыра кылым пеҥгыдемдыме шотышто мероприятий-влак планым ыштеныт.
Д.Речкинын фотожо.