Баянист, агроном, тале организатор…

Чолга пӧръеҥ Анатолий Павлович Степанов дене 70 ийым темымыж кечын, 17 августышто, палыме лийым. Ты пайремжым йолташыже-влак дене уло кумылын эртарен, нуным пакчаште ончен куштымо кугу помидоржо, пареҥгыже дене сийлен, шылым кӱктен. Илыш корныжым шергал ончалына гын, тудо тыглай агрономланат тыршен, вуйлатыме пашамат шуктен.

Кум профессийым налын

А.П.Степанов Медведево районысо Юбилейный посёлкышто Мария Сергеевна пелашыж дене ила. Эргышт – Москошто.

Марий Турек район Семёновка ялыште шочын-кушшо Анатолийым ачаже Татарстанысе Арск педучилищыш тунемаш наҥгаен. Варажым рвезе Йошкар-Оласе музыкальный училищым тунем пытарен. Ик жап гыч Марий аграрный колледжыште агроном специальностьым налын. Кум дипломжат илышыште кӱлеш лийын.

Марий Турек районысо Касьяново ялыште шочшо да книгагудышто пашам ыштыше ӱдырым марлан налын.

Музык аланыште

Музыкальный училище деч вара Анатолий Марий Турек посёлкыш толын. Тунам тӱвыра пӧлкам Михаил Васильевич Сабанцев вуйлатен. Самырык специалистлан тудо Марий Турекысе йоча сымыктыш школ директорын сомылжым ӱшанен. Баян дене шоктен.

Анатолий Павлович 9-ше классыште тунемше, а кызыт мурызо Лидия Ороспаевам (Бочкарёва) шарналтыш. Тудлан концертлан кок мурым туныктен. «Молан кокыт?» ӧрын Лидия. «Сценыш угыч ӱжытат, мурет» манын. Тыгак лийын.

УМБАКЫЖЕ — 26 августысо «Кугарня» газетыште лудса.