Россий студенчествын кечынже Марий Элым Вуйлатыше Ю.Зайцев МарГУ-што тунемше студент еш-влак дене вашлийын.
Нуно Вуйлатышылан йодышым пуэденыт. Тыгодым самырык ешын илыме условийже, самырык учёный ден шымлызе-влаклан полшымо нерген проблемым тарватыме.
Варажым Ю.Зайцев МарГУ-н Ректорский балыштыже лийын. Тудо 2010 ий годсек эртаралтеш. Ты гана балыш чыла факультет гыч 150 активист ушнен.
Марий Элым Вуйлатыше студент ден Татьяна-влакым саламлен да студенческий молодёжь республикнан научно-технический, усталык потенциалжым шукемдаш, у технологийым, тенденцийым да сымыктышым ешарен шогаш тӱҥалеш манын ойлен.
Ешарена: МарГУ-што кызыт 223 Татьяна уло (164 студент да 59 преподаватель).