У Торъял посёлкышто шочшо Наталья Курочкина шочмо вершӧрыштыжӧ, Моско областьыште да Азов теҥыз воктене пеледышым, пакчасаскам, фруктым ончен кушта.
Н.И.Курочкина 2006 ий годсек Москошто ила. Тудо Москосо Здравоохранений департаментыште врач-методистлан пашам ышта. А тылеч вара шкем кушкыл дене кылдалтше сомыллан пӧлекла. Шкем садовод-любитель улам манеш, кеч ынде профессионалат лийын шуктен.
Наталья Игоревнан пеледыш композицийлаже Марий Элыште эртарыме конкурслаште икымше верла дене палемдалтыныт. Тыгак Москосо ВДНХ-ште Цветоводство рӱдерыште пеледышым ончен куштымо шотышто лекцийым лудеш.
Землячкына Марий Элыште 2023 да 2024 ийлаште эртарыме «Мисс Фазенда» конкурсыш ушнен. А Йошкар-Олаште Сад-пакчазын кечыштыже шке кушкылжо-влакым кок ий почела пӧлек шотеш кучыктен.
– Наталья Игоревна, тӱрлӧ ончерыш, ярмиҥгаш чӱчкыдынак лектыда ала мо…
– Теве 4-5 апрельыште Йошкар-Оласе ик ужалыме рӱдерыште пеледыш ончер-ярмиҥгаште пӧлемысе кушкыл-влакым калык ончыко луктынам. Ты жапыште 3-6 апрельыште ВДНХ-ште «РМ» ужалыме рӱдерыште «Фазенде» ончер-ярмиҥгашке ушненам. А 6 апрельыште кушкыл мастерскойым Кужэҥер посёлкышто почым, мастер -лассым эртарышым. 10 майыште туштак пӧлемысе да садысе кушкыл-влакым луктам, тӱрлӧ урлык пареҥге ден шоганымат калыклан темлем.
– А шочмо кундемыштыда ончен куштеда?
– Кодшо ийын мартыште У Торъял посёлкысо пачерыштем пеледыш оранжерейым почынам. Тудым кугу пальме-влак сӧрастарат, пӧлемыште ончен куштымо моткоч шуко пеледыш, кушкыл улыт.
Тыгак шуко сорт пареҥгым, пеш чот тамле шоганым, томатым, шере пурысым, баклажаным ончен куштем. Шуко урлыкым мый шкеак ыштенам.
– Тендан шонымаште, Марий Элыште могай сорт пареҥгым шындаш келшен толеш?
– Пареҥгылан тӱрлӧ ӱяҥдышан да кушкылым сайын шочыктен кертше виян мланде кӱлеш. Ик условийже – тидлан ойырымо вер утыждене вӱдыжгӧ да ӱмылан лийшаш огыл. Мый шкеже Марий Элыште «Фиолетовый», «Адретта», «Богатырь», «Ред Скарлетт», «королева Анна», «Латона», «Иван да Марья», «Каратоп» да «Сюрприз» сорт пареҥгым шындаш келшен толмылан шотлем. Нине урлык пареҥге-влак чӱчкыдын огыт черлане, тыгодымак тамле улыт да кужу жап сайын аралалтыт.
– Эше могай пакчасаскалан урлыкым шкеак луктында?
– Мыйын шке сорт коллекцием уло. Теве помидор-влак коклаште «Сливка» сорт ик вондышто 30-40 саскам пуа. Тыгак «Черри», «Сочный апельсин» (пешак тамле), «Розовый», «Бычье сердце» сорт-влаклан, «Разноцветное чудо» пурыс ден «Чудо» баклажанлан нӧшмым шкеак ямдыленам.
– Наталья Игоревна, кузе да кунам кушкыллан шӱмаҥында?
– Чылажат 2020 ийыште туя деч тӱҥалын. Тунам мый 80 см кӱкшытан 15 вондым шынденам. Кызыт нуно кум метрыш шуйналт шогалыныт.
Вара роза пеледышлан кумылаҥым. Кызыт 150 наре сортем уло. Нуным 17 майыште Йошкар-Оласе ик ужалыме рӱдерыште ужалаш луктам.
– Азов теҥыз воктеныже сомылым кузе ыштен шуктеда?
– Ме тушко май гыч сентябрь марте кажне тылзын кудалыштына. Ейск ола деч тораштак огыл 10 сотык мландына уло. Тушто виноградым, абрикосым, черешньым ончен куштена. Емыжым огына ужале, калыклан пуэдена, тыгак тӱрлӧ йӱышым ыштена. Тушко террасан кок изирак пу кудым шынденна. А фруктым ончен кушташ ик пашаеҥ полышкала.
Лишыл жапыште эше ик проектым илышыш шыҥдараш шонем: Моско областьысе участкынам келыштараш тӱҥалам. Садыште пӱям ышташ, пушым вераҥдаш, а пӧртыштӧ пӧлемысе кушкыл ден пеледышым вераҥдаш шонем.
Н.И.Курочкина кушкыл-влакым ончен куштымо пашам туге чот йӧратен шынден, эре иктаж-могай сомылым верештеш. Арняште вич кече медицине пашам шукта, а вара сӧраллык тӱняшке кусна. Вет кушкылын кажне лышташыжым тудо сымыктыш семын ужеш.