Марла кутырен моштышо вес калыкын шочшыжым вашлият гын, трукышто ӧрат. Южгунамже тыге лийынжат огеш керт манын шонет. Теве Йошкар-Олаште шочын-кушшо, МарГУ-што калыкле тӱвыра да тӱвыра кокласе коммуникаций институтышто кумшо курсышто тунемше азербайджан ӱдыр Сейран Агамалиеван шочмо йылмына дене пелештен колтымыжо, марла почеламутым лудмыжо кугешнымаш кумылым лукто. Школ жапыштак Колумб лудмаште мастарлыкшым ончыктен да сеҥышыш лектын.
Азербайджан гыч Марий Элыш
Агамалиевмыт еш Йошкар-Олаште шукертак илат, ешыште – кум икшыве. Сейранын Будаг изаже Владимир олаште юридический институтышто тунемеш, Аслан шольыжо Йошкар-Оласе 3-шо №-ан школышко 5-ше классышке коштеш. Ӱдырын ача-аваже шке пекарньыштышт пашам ыштат.
– Мыйын ачам ден авам Арменийыште шочын-кушкыныт. Но варажым нуно Азербайджанышке илаш кусненыт. Ешаҥмекышт, Марий кундемыш толыныт. Йошкар-Олаштат ачамын кок изаже, тыгак Азербайджаныштат шуко родо-тукымна улыт. Пытартыш гана ме тушко 2015 ийыште миенна.
Ача-аванан кум икшывыжат азербайджан лӱман улына. Мыланем ковамын лӱмжым, Сейраным, пуэныт. Шочмо йылмышкына кусараш гын, тудо «шонымашке шуаш тыршыше путешественник» манмым ончыкта. Ковам кызыт Азербайджаныште ила.
Кавказ еш семын чоткыдо закон дене тунар огына иле. Ачам ден авам шкем шуараш, тунемаш кумылаҥдат. Мӧҥгыштӧ ме азербайджанла, рушла мутланена.
Тыгак ме ешге Йошкар-Олаште улшо азербайджан-влакын диаспорышкышт коштына. Марий кундемыште тушко 3000 азербайджан погына. Тушто тӱрлӧ мероприятий эртаралтеш, – мане Сейран.
Марий йылмылан шӱмаҥын
Азербайджан ӱдырым марий йылме йоча пагытше годымак сымыстарен. Адакшым пошкудыжо-влакат марий лийыныт. Но эн чотшо марий йылмылан ӱдыр рӱдоласе 3-шо №-ан школышто тунеммыж годым кумылаҥын. 5-ше классыште марий почеламут корнылам сылнын лудмыж дене туныктышо-влакын кумылыштым налын.
– Школышто марий йылмым Елена Семёновна Зыкина, марий литературым Ольга Николаевна Метелёва туныктеныт. Актёр мастарлыкем эре лийын. Ончыч руш йылме дене лудмо сылнымут конкурсышто шкемым тергенам. 2015 ийыште Артекыште эртыше «Живая классика» конкурсышто сеҥышыш лектынам ыле. Но марий конкурсышко тунам ик ганат ушнен омыл, тыге тушто шкем терген ончаш кумыл лектын. 2016 ийыште 9-ше классыште тунемме годым Колумб лудмаште 3-шо вер дене палемдалтынам. 2017 ийыште ты лудмашыште республикыште 2-шо верыш лекмеке, мыйым регион-влак кокласе турышко колтеныт. Тудо Морко посёлкышто эртен, туштат мый 2-шо верым налынам, – мане С.Агамалиева.
Икгай шомакым муэш
Сейран марла кутырен мошта. Южо марий шомакым азербайджан йылме дене таҥастара да шуко икгайлыкым муэш. Тудлан марий калыкын тӱвыраже, йӱлаже, муро-куштымашыже келшат.
Умбакыже 18 мартыште лекше у номерыште лудса.