Палымына-влакын пырысышт игым ыштен. Иктыже мемнан лиеш манын, нунылан иканаште ойлышна. Кушкын шумыштым вучышымат, ик тылзаш пырысигым мӧҥгӧ кондышым. Дымок ате гыч шӧрым кочкын ок мошто ыле, тӱҥалтыште шприц дене пукшаш логалын. Тудо пеш вашке кушко. Пакчаште кошташ йӧрата, колям кученат конда ыле. Колям кудывече покшелан конден пышта да, мемнан толмеш, воктеныже шинча ыле. Ме тудым ниялтена да молодец, Дымок, манына.
Пырыснан койышыжо тыглай огыл ыле. Кидышке налат — удырен-удырен вола, оҥ пелен ӧндалашат ок пу. Диваныште телевизорым ончен кийымем годым йол пелен шке толын возеш, но кидышкем налаш тӱҥалмем годым адакат кораҥеш. Дымок пелашем дек утларак шӱман ыле. Канен кийымыж годым оҥышкыжо шкеак миен возын, а йӱдым тудын йол мучаштыже малаш йӧратен.
Шукерте огыл пелашемын изаже йыҥгыртен да ялна воктенысе корнышто колышо пырыс кия манын ойлен. «Тӱсшӧ дене тендан пырысда гай коеш», — манын. Тиде чынжымак Дымок лийын. Корным вончышыжла, машина йымак логалын.
Мо ӧрыктара: тудо кечын пелашем паша дене тора корныш тарванышаш ыле, но машинажым заводитлен кертын огыл. Тылеч ончыч кастене машина дене кудалыштынна, чыла сай лийын. Вуйышто тӱрлӧ шонымаш пӧрдеш. Пырысна озажым ала азап деч утарен коден?
Екатерина.
У Торъял район.