Йошкар-Оласе Перинатальный рӱдерыште 17 ноябрьыште оҥай пайремыште йоча ден кугыеҥ-влаклан икымше пачашысе холлышто шыгыр ыле. Но вашке рӱдерын у корпусшо чоҥалтшаш.
Рамкыш:
Тӱняште кажне кечын 15 миллион наре йоча жап деч ончыч шочеш. Тидыже кокла шот дене – кажне луымшо аза.
Йошкар-Олаште кажне 16-шо ньога жап шумо деч ондакырак ош тӱняш толеш. 2017 ийыште 6329 аза кокла гыч 369 азаже жап деч ончыч шочыныт, 2018 ийыште 5775 йоча кокла гыч – 361-ынже.
У корпус лиеш
2020 ий мартыште у Перинатальный рӱдерым чоҥаш тӱҥалыт. Тыгай у полат лиеш манын, врач-влаклан эше вич ий ончычак ӱшандареныт улмаш. У рӱдерыште у технологийым кучылташ йӧным ыштат, ӱдырамаш ден аза-влаклан сай условийым темлат.
Ты кум пачашан корпусын 5,8 тӱжем кв метр кумдыкым айла. Тушто азам ыштыме (родовой) кандаш индивидуальный палатым йӧнештарат. Тыгак индеш койкан интенсивный терапий отделений, 12 кювез верланыман (лач тыгайыште азалан кислород автоматически пуалтеш да кӱлеш температур кучалтеш) реанимаций ден интенсивный терапий отделений, тылеч посна мӱшкыран ӱдырамашым эмлыме да шочын вочшо азам кокымшо этапыште ончен куштымо отделений лийыт.
«Марий Эл Правительствым вуйлатыше Александр Евстифеевын полшымыжлан кӧра у Перинатальный рӱдерым чоҥаш оксам федеральный бюджет гыч ойырымо. 2020-2021 ийлаште ик миллиардат 700 наре теҥге оксам кучылташ палемдыме, – каласыш рӱдерын тӱҥ врачше Н.В.Сушенцов (снимкыште). – Ме моткоч кугу объектым чоҥышаш улына, миллиард утла теҥге оксам кучылташ палемдыме корпусым икымше гана чоҥена. Тыгай стройкым ятыр организаций, общественный гыч тӱҥалын строительный марте, терген шогышаш. Тыгодым кӱлешан йодыш-влакым ончен лектына, молан да кӧлан тиде чоҥалтмым, могай жапыште шукталтмым еҥ-влаклан умылтарен кертына. Вет ме полатым шкаланна огыл, а республикыште илыше еҥ-влаклан чоҥена».
Миллиард теҥге утла оксам кучылташ палемдыме госзакупко годым закон почеш ты сомыл шотышто еҥ-влак шке шонымашыштым каласышаш улыт. Тидыже кок этап дене шукталтеш: Интернетыште «Обязательное общественное обсуждение закупок» разделыште шке шонымашым возаш лиеш; очный публичный слушаний-влак эртаралтыт.
Умбакыже «Кугарня» газетын 22 ноябрьысе лаштыкыштыже лудса.