Аважын кумылжым ончен…

Книгагудо пашаеҥ-влак.

                                                                                                                 Книгагудо пашаеҥ-влакым профессионал кечышт лӱмеш

 Оршанке район Яндылет ялеш шочын-кушшо Екатерина Иванова (ӱдыр фамилийже Смирнова) Тошто Крешын да Йошкар-Оласе 2-шо №-ан школлаште тунемын. 11-ше класс деч вара МарГУ-што «Библиотечное дело» специальностьым налын. Аваже Галина Васильевна самырыкше годым библиотекарь лияш шонен, ты шонымашыжым ӱдыржӧ шуктен.

2013 ий годсек Екатерина С.Г.Чавайн лӱмеш книгагудын маркетинг пӧлкаштыже пашам ышта.

«Ме книгагудын пашаж нерген сайтлан, СМИ-лан да иктаж-куш вераҥдаш уверым ямдылена. Юбиляр-влакым эскерена, тидын нергенат возена. 28 майыште 18 гыч 22 шагат марте «Библиойӱд-2022» акцийым эртарена. Тений тидлан мемнан пӧлкана вуйын шога. Библиотекыштына ятыр вашлиймаш, книга презентаций, ончер да моло мероприятият икте почеш весе лиедат. Нунылан рекламым ыштена, мероприятий нерген уверым серена», – мане Е.Иванова.

Мартыште книгагудо пашаеҥ-влак полатын тӱрлӧ пачашыштыже Российысе калык-влакын тӱвыра поянлыкышт идалыклан пӧлеклалтше ончерым вераҥденыт. Тыгайже эре уэмдалтынак шога.

Самырык пашаеҥ да ава йочасадыш коштшо кок икшывыжымат книгалан, марий тӱвыралан шӱмаҥда. Кугуракше, Кирилл, «Воштончыш» музыкально-драматический театрыш коштеш. Кум ияш ӱдыржат аважын книгам кондымыжым кажне кечын вуча.