Татарстан Республикысе Набережный Челна олан ӱдыржӧ Надежда Чермакова «Эрвий» йоча марий клубын да калык лӱмым нумалше «Марий сем» ансамбльын участницыже.
Шочмо калыкын культуржым арала
Надя – чолга ӱдыр. Тудо марла мураш, кушташ йӧрата, марий сӧрастарышым шке ышта.
– Мый 9-ше классыште шинчымашым погем. Тунеммаш деч посна тӱрлӧ мероприятийыш ушнем. Регионыштына тӱвыра рӱдер, коллектив-влак марий культурым аралымаште чот тыршат. Кажне изарнян «Родник» калык-влак кокласе келшымаш пӧртыштӧ школышто тунемше да йочасадыш коштшо йоча-влаклан «Келшымаш урок» эртаралтеш. Тыгай вашлиймаште тӱрлӧ калыкын представительже йоча-влакым шке тӱвыраже, йылмыже, йӱлаже, национальный вургемже дене палдара, мастер-классым эртара, концертым ончыкта. Мыят тыгай программыш чӱчкыдын ушнем. Тылеч посна марий сӧрастарышым шке ыштем, национальный костюмымат шке тӱр дене келыштарем.
Ачам – Одо кундем Грах районысо Кугу Йырсе ялысе марий, а авам – чуваш. Ешыштына утларакшым рушла мутланена. Но ачам дене, ачамын могырым родо-влак дене марла кутырем. Ачамын шочмо ялышкыже унала мияш чӱчкыдын тыршем. Мылам чонемлан тиде лишыл вер. Лач тушто марий калыкемын культур ден йӱлажым чотрак шижам. Ялыште лийме годым «Йырсе памаш» фольклор коллективын репетицийышкыже коштам, нунын дене пырля выступатлем – ойла Н.Чермакова.
«Эрвий» ден «Марий сем»
Надя марий улмыж дене кугешна. Калыкнан шкешотан улмыжым ончыкташ тӱрлӧ семын тырша.
– Марий-влакын Набережный Челна оласе национально-культурный автономийжын председательже, «Эрвий» клубым да «Марий сем» ансамбльым вуйлатыше Евгения Анатольевна Селезнёва олаштына марий тӱвыранам аралымашке шуко надырым пышта, мыйым да моло ӱдыр-рвезе-влакым усталыклан кумылаҥда.
Ме Йошкар-Олаште Пеледыш пайремыште ятыр гана уна лийынна, Республикыштына эртаралтше «Мы – ветви древа одного» финн-угор калык-влакын усталык фестивальышкыже эреак ушнена. Тений «Марий сем» ансамбльна Пошкырт кундем Калтаса селаште «Ший кандыра» фестиваль-конкурсышто мастарлыкнам ончыктенна да икымше степенян лауреат лӱм дене пӧртылынна. Концерт дене тӱрлӧ ялыш коштына.
«Эрвий» клуб дене «Марийская радуга» этнокультурный фестивальыште участвоватленам. Тушто мый шкемын сольный номерем ончыктенам, – манеш творчествылан шӱман ӱдыр.
Н.Чермакова марий калык ынже йом, тудын йылмыже мотор, келге шонымашан йӱлаже, тӱвыраже илыже манын шона да тидлан чот тырша. Вет калыкын ончыкылыкшо – самырык еҥын кидыштыже.
Н.Чермакован альбомжо гыч налме фото-влак.