17 апрельыште Марий Элысе волонтёр-влакын «Сердце матери» мер ушемышт СВО участник-влак дене вашлиймашым эртарен. Тушко «Шьём для наших» тӱшкан еҥже ден журналист-влак миеныт.
Каласыман: ты ушемын пӧлемышкыже (а тудо Эшкинин уремысе 10 «Б» пӧртыштыжӧ верланен) СВО участник-влак отпускыш толмекышт пурен лекташак тыршат. Шукыж годым фронтышто улмышт годым нунылан кӱлеш оборудованийым, арверым, кочкышым, вургемым да молымат поген колтышо-влакым таушташ толыт.
– Ондак тыгай вашлиймаш шуэн лиеден, вет ятыр жап рвезе-влакым отпускыш ышт колто. Пытартыш жапыште арнялан иктаж кок гана салтак-шамыч толын каят. Сандене ме нунылан пӧлекым ямдыленак шогена. Нунылан ме шагатым, военный вургемым да молымат пӧлекленна. Таче толшо-влаклан кажныжлан кеҥежлан келшен толшо костюмым пуышна. А вашке Шочмо элым аралаш кайыше ик салтаклан коллиматорный прицелым кучыктышна. Тыгак нуно мо кӱлмым шкешт ойырен налыт.
Ме унала пурышо-шамычлан куанена да кажне гана чайым пырля йӱын кутыркалена. Тыште, шочмо верыште, нуно вучымо уна улыт, а меже тыршымынан пайдалыкшым шижына.
Пытартыш гана гуманитарный грузым ме теҥгече (16 апрель – Авт.) колтышна. Весыжым май кыдалне колташ шонена.
Чынжым ойлаш гын, кызыт колтымо грузна миен шуын огыл, а нуно у йодмаш-влакымат колтылыт. Адакат оксам погаш, нунын дене налаш тӱҥалына, – каласкала волонтёр Т.Авгученко.
Тамара Александровнан – марийже военный, казак тукымыштыжат чыланат военный лийыныт.
Икманаш, кызыт полшаш шонышо-влаклан оксам волонтёр Светлана Николаевна Корчагинан картышкыже (2202 2036 1365 5283) колтыман, «благотворительность» манын палемдыман.
Кодшо кечылаште мер ушемыш 80 ияш ковай пенсий гыч поген ситарыме 10 тӱжем теҥгежым намиен. Шке эркын веле коштеш, но кумылжо дене тудат полшынеже, Сеҥымашым лишемдынеже. Меат кажныже ты поро пашашке ушнена гын, салтакна-влаклан гына огыл, уло элналан кугун полшена ыле…