Эртыше кечылаште «Сердце матери» толкынын офисыштыже шочмо кундемыш СВО гыч толшо кок еҥ дене вашлиймаш эртаралтын. «Медведь» да «Зорг» позывноян кок командир отпускыш толын. Йошкар-Ола гыч пӧръеҥ-влак Луганск Калык Республикысе Белогоровка посёлко воктене службым эртат. Коктынат «За боевые заслуги» медаль дене палемдалтыныт.
– СВО-што улмо годым полышым эреак налына, Марий Эл гыч колтымо посылкылан поснак куанена. «Сердце матери» толкын дене кылна эре пеҥгыде: мо кӱлеш гын, организацийыш йодмашым возен колтена, а волонтёр-влак тыманмеш чыла ямдылат да, йӧным муын, гуманитарный полышым поген колтат. Садлан нунын дене вашлияш да, шинчаваш ончен, таум ойлаш мыланна моткоч куанле, – маныт боец-влак. – Полыш дене пырля йоча-влакын возымо серышыштымат колтат. Тыгайжым лудатат, южгунам кумылат тодылалтеш. Мемнан, пырля служитлыше салтак-влакын кумылна боевой, ӱшанена: сеҥымаш мемнан лиеш. Моло регион гыч пырля служитлыме салтак-влак дене икоян улына.
Вашлиймаш годым «Сердце матери» толкынын волонтёржо-влак пӧръеҥ-шамычлан икмыняр молитвословым кучыктышт. «СВО-што улшо рвезе-влак изирак юмоҥа-влакым колташ чӱчкыдын йодын возат. Воин-влаклан лӱмын молитвословым налынна, нуным кӱсеныштат коштыкташ лиеш. Тек салтак-влак ӱшан дене илат, вет ӱшанын вийже кугу», – маныт поро кумылан волонтёр-влак.
«СВО-што кызыт мо эн чот кӱлеш?» йодыч вашлиймаште боец-влак деч. «Йӱдым ужаш полшышо прибор-влак кӱлыт», – лие вашмут. Да «Сердце матери» толкынын еҥже-влак боец-влаклан тепловизорым тунамак кучыктышт. Эше когыляныштат шокшым кучышо йымал вургемым пӧлеклышт. «Тек тудо тендам аван шӱмжӧ семынак ырыкта», – маньыч волонтёр-влак. Боец-влакын колтымо йодмашлаште бытовой арвер кӱлмӧ нерген чӱчкыдын возат. Дождевикым, резин кемым, йымал вургемым йодыт.
– Ӱмаште шыжым военкоматыш миенам да мыйым СВО-ш колташ йодынам. Кум икшыван ача улам, тудо жаплан кугурак эргым армий гыч пӧртылын ыле. Мыйын СВО-ш каяш шонымем нерген пален налмеке, пелашемын кумылжо волен, но тудо мыйым чарен огыл. Ӱмаште 15 октябрьыште мобилизоватленыт, тений январь марте тунеммашым эртыме. 20 январьыште СВО-ш кайыме. Тиде икымше отпускем. Ик арням ешем дене мӧҥгыштӧ эртаренам, родо-тукымем дене вашлийынам, садыштат пашам ыштен шуктенам, – манеш «Медведь» позывноян командир.
Полшыде ок чыте
«Полышем кеч ик боецын илышыжым утарен кодаш полша гын, чонемлан ласкарк лиеш», – манеш Йошкар-Ола гыч Н.М.Чернова.
Нина Михайловна – сӱретче. Тудо «Сердце матери» толкын ышталтме почешак волонтёр-шамыч дене кылым куча. Кажне тылзын организацийыш гумполышым налаш оксам колта.
– Тылеч ончычат телевизорышто, соцсетьлаште полыш кӱлмӧ увер-влакым ужынам да кертмем семын СВО участник-шамычлан полшенам. Эргым таҥаш самырык рвезе-влак Шочмо элна верч шогат, тыгай годым кузе ӧрдыжеш кодам? Акамын эргыжым 10 тылзе ончыч мобилизоватленыт. Кызыт – эмлымверыште. Полшыде ом керт, койыш-шоктышем тыгай, ача-авам тыге ончен куштеныт. Садлан «Серце матери» толкын нерген пален нальымат, волонтёр-влак дене кылым ыштышым, жап лийме семын офисышкышт миен толам. Оксам кажне тылзын колтем, кунам гын 30 тӱжем теҥгем, южгунам – 40 тӱжем теҥгем, – ойла Н.Чернова.
Нина Михайловна памятниклаш портрет-влакым сӱретла. Художниклан икымше да кокымшо Чечня сарлаште вуйым пыштыше ятыр салтакын портретым сӱретлаш логалын. Кажне тыгай портретым ямдылыме годым Н.Чернова колышо салтакын аваже але пелашыж дене кутырен, тудлан ятыр шинчавӱдым, ойгым ужаш логалын. А кызыт СВО-што колышо рвезе, пӧръеҥ-влакын портретыштым памятниклаш сӱретлаш йодын толыт. Тыгай годым ӧрдыжеш кодаш нигузе ок лий. Поро кумылан ӱдырамаш СВО кайыме верыш гуманитарный полышым шкежат наҥгайынеже. «Тидлан йӧн да жап лиймеке миенак толам», – манеш тудо.
Н.Чернова семын СВО участник-шамычлан полшаш шонеда гын, «Сердце матери» толкынын офисышкыже (Йошкар-Ола, Эшкинин урем, 10б номеран пӧрт, 201-ше кабинет) толын кертыда. Лекше йодышым 89023585714 номеран телефон дене йыҥгыртен рашемдаш лиеш.
Авторын да Н.Чернован альбомжо гыч налме фото.