17 ияш улмем годым авам, рак чер дене черланен, илыш гыч кайыш. Тудо шукак ыш орлане, чер писын вияҥын да тунамак тудым пытарен. Ме коктын иленна, садлан шкетын кодмек малаш лӱдынам. Тыге ик кечын ик йолташ ӱдырем, вес кечын весе толыныт. Нуно шке йолташыштым пырля конденыт. Тыглай кас-влак мемнан шкешотан пайремыш савырнаш тӱҥалыныт.
Ик тыгай кастене пачерыште Андрей уна лийын. Жап эртымеке, мӱшкыран улмем пален налынам. Вигак йочам кудалташ шонен пыштенам. Тушко кайыме деч ончыч омым ужам: пуйто авам ден кидым кучен ошкылына.
«Кушко тыге каена?» – йодам мый. Колышо авам мыланем титак деч посна илыш гыч кайыше йоча-влакын чонышт кушто улмым ончыкташ наҥгаем манын. Ты ой деч вара ончылнем кугу пасу «сӱретлалтын». Туштыжо шотлен пытараш лийдыме йочан шӱгарже. Нуным ырес деч посна тойымо. Ик тыгай шӱгар воктене шогалмеке, колымо кечым ончыктымым да номерым шекланенам. «Тидыже мом ончыкта?» – йодынам авам деч. «Ты верым тый шке ӱдыретлан, мыйын уныкамлам ямдыленат. Молан тый тудым пуштнет?» – манеын колышо авамын ойганыше йӱкшӧ. Мый тудлан шкет ӱдырлан йочам ончаш куштылгыжак огыл, тӱрлӧ нелылык дене тӱкнаш логалеш манын умылтаренам. Тыгодым авам коклаш пурен да ныжыл йӱкшӧ дене тыгерак пелештен:
– Чечас мый тыланет икмом ончыктем.
Тылеч вара кугу экран ончылно ончыктымо гай сӱрет сӱретлалтын. Пуйто мотор чевер кече онча, теҥгылыште самырык ӱдырамаш шинча. Воктеныже йыгыр ӱдыр йоча-влак куржталыт, юарлат, шке семынышт мутланат. Коктынак икгай мотор тувырым чиеныт, йолыштышт – йошкар туфльо. Тылеч вара чонышто пуйто ласкалык, ныжылгылык ылыжын, кумыл тодылалтын, шинчавӱд йоген. Ты жапыштак авам кидшым вачышкем пыштен да пелештен:
– Ты самырык ӱдырамаш – тыйын шочдымо ӱдырет. Изи икшыве-влак уныкат улыт. Ит пушт нуным, вет вӱрыштышт мыйынат вӱрем.
Помыжалтмек, мом ужмемым ятыр жап ушыштем пӧрдыктенам. Сумка гыч эмлымверыш кайышаш документым лу -влак омышто ужмо йочан шӱгар ӱмбалныже ончыкталтыныт ыле. Тунамак кагазым кушкедынам.
Ӱдыремлан Таня лӱмым пуэнам. Жап эртымеке умыленам, тунам авамын омышкем толмыжо мыйым осал паша деч кораҥден. Ӱдырем марлан лектын, йыгыр ӱдыр-влакым ыштен. Ик кеҥеж кечын нунын деке унала толмем годым кумло ий ончычсо омем шинча ончылнем уэш «сӱретлалтын». Чоныштем ты татыште мо ышталтын, каласашат ом тошт…
Таня Т.
Йошкар-Ола.