Ава — пеленнак

Тиде ик ий ончыч лийын. 80 ийым эртыше авам кок ий наре мемнан дене пырля олаште илен. Тудым тойымо кечын омым ужынам. Йӱд. Чылан малат. Колам, пуйто омсам ала-кӧ тӱкала. Койко гыч кынелын, омсам почым, тушто авам шога. Лавыран вургеман, шортеш. «Ӱдырем, пуртет мо? Пешак мӧҥгӧ толнем», — манеш. Авамыс, кузе ом пурто. Тудо малыме пӧлемышкем эртыш, мый — почешыже.

Икмыняр жап гыч омсам адак тӱкалтышт. Почым, ваштарешем шем вургеман кок еҥ шога. Шӱргышт ок кой, капюшоным чиеныт. «Авада тыште лийшаш огыл. Молан тудым пуртенда?» — йодыт нуно. Вара малыме пӧлемыш кайышт да авамым вӱден луктыч. Тудыжо шортеш. «Мыйын нерген молан каласышыч?» — манеш. Почешышт омсам петырышым да уэш малаш возым.

Эрдене омем нерген пелашемлан да икшывем-влаклан каласкалышым. А мыланем тыге чучеш, пуйто тиде омо огыл, а чынжымак лийын. Тылеч вара икшывем-влакат ик гана огыл ойленыт, пуйто ковашт кухньышто йӧратыме верыштыже (холодильник воктене) шинча. «Кухньо воктечын эртен кайыме годым ончалат — ковай шинча. А вара ик тат гыч шарналтет — ковайже коленыс. Кухньо могырыш уэш вуйым савыралат, но тушто иктат уке», — каласкалат нуно.

Лӱдмашан огыл. Авам эре ойла ыле: «Колышо деч огыл, илыше айдеме деч лӱдман».

Лидия.

Йошкар-Ола.