Кылме тылзын пытартыш рушярнянже ме чыланат Аван кечыжым палемдена. Шӱргыял школыштына тиде пайремым кажне ийынак пайремлена. Ты тунемме идалыкыштат «Рвезе тукым» йоча ушемнан паша кышкарыштыже школ пеленысе йочасадыш коштшо икшыве-влаклан да тӱҥалтыш класслаште тунемше-шамычлан ме кум тӱрлӧ таҥасымашым ямдыленна: «Мыйын авам – эн…» раскраскым чиялтымаш, «Авамлан серыш» почеламут форман серышым шочыктымаш да «Тылат, йӧратыме аваем!» открыткым ыштымаш.
«Рвезе тукым» йоча ушемнан эн чолга тунемшыже-влак («Ал парус») отрядын кок рвезышт, Костя Сергеев ден Максим Алексеев, «Авамлан серыш» таҥасымашке уло кумылын ушненыт. А вес кок таҥасымаште йочасадысе да тӱҥалтыш класслаште тунемше ӱдыр-рвезе-влак чолгалыкым ончыктеныт. Нине икшыве-влак чыланат шке кид дене ямдылыме пашаштым Аван кечыж годым шке йӧратыме аваштлан кучыктеныт. Вет шке шочшо деч налме пӧлек керек-могай аваланат эн чот шерге.
Тыгак кылме тылзын коло визымше кечынже Ава кече лӱмеш Кораксола тӱвыра пӧртыштӧ пеш чапле концерт лийын. Тышке адакат Шӱргыял школнан икмыняр тунемшышт уло кумылын ушненыт, «Муро кумыл» фольклор ансамбль ден Ярансола ялын чолга гармоньчыжо Вениамин Борисов шке мастарлыкыштым ончыктеныт. Шукерте огыл «Муро кумыл» фольклор ансамбльыш у еҥ-влак ушненыт. Нунылан поснак таум каласымем шуэш.
Тек ончыкшымат мемнан Шӱргыял школна ден Кораксола тӱвыра пӧртна тыгак виян пашам ыштат, йоча-влакнат чулым лийыт да верысе калыкат уло кумылын ансамбльышке ушнен шога. Вет арамлан огыл калык ойла: «Тӱшкаште – вий, келшымаште – сай лектыш».
Елена Григорьева, Шӱргыял школын вожатыйже.
Снимкыште: Шӱргыял школышто Ава кече лӱмеш эртаралтше таҥасымашке ушнышо эн чолга ӱдыр-рвезе-влак.