Советский районысо академик Л.И.Ожиганов лӱмеш Ӧрша тӱҥ школышто тунемше-влакын «Дети войны» фильмышт «Шӧртньӧ кадр» республикысе кинофестивальыште икымше верым налын.
Школышто видеом, фильмым войзаш туныктышо посна кружок уке. Тышке «Созвездие» йоча ушемын аквистше-влак ушненыт. Видеом сниматлыме годым нуно 1-4-ше класслаште тунемыныт, кызыт 4-7-ше класслаште улыт.
Ты сомыллан Ӧрша школышто 12 ий пашам ыштыше, йоча-влакым руш йылмым да литературым туныктышо кумылаҥда. Шуктымо пашашт нерген Ирина Нагаева тыгерак каласкалыш:
– Мый шкеже фотосӱретым ышташ, видеом сниматлен, видеороликым ямдылаш шӱман улам. Тунемше-влак дене пырля тӱрло конкурсышто вийым тергаш йӧратена. 2021 ийыште районыштына «С любовью к Родине!» видеоклип конкурс эртаралтын ыле. Ончылгоч творческий проектлан «Дети войны» мурым ойыренна. Тудым мураш тунемынна, вара диктофоныш возенна. Тиддеч вара видеом сниматлаш тӱҥалынна. Тидыже проектын эн оҥай этапше лийын. Видеоклиплан шуко атрибут кӱлын огыл, вургемым ача-ава-влак ямдылаш полшеныт. Видеом сниматлыме годым у шонымаш-влак лектыныт, мом кузе ужмыштым йоча-влакат темленыт. Вара видеоредакторышто видеолапчык-влакым иктыш ушенам.
Ме творческий пашаштына сар годымсо йоча-влакын илышыштым ончыктена. Нунылан йӱшто лийын, шужен иленыт, лӱдыныт. Неле пашам ышташ пернен. Но коча-кована, а йоча-влакын кугезе коча-ковашт, тидым илен лектын сеҥеныт.
Тунам видеоклипна конкурсышто Гран-при дене палемдалтын ыле. А кодшо ийын ме пашанам «Золотой кадр» VIII республиканский йоча кино кинофестивальыш колтышна. У ий пайрем вашеш школышкына поро увер тольо. Пашанам республикыште кӱкшын акленыт. 10-13 ияш йоча-влак коклаште икымше верым сеҥен налынна.
Тунемше ден организатор-влаклан кугу таум каласынем. Тыгай конкурс-влак тунемше-влаклан шуко пайдам пуат. Йоча-влак шкаланышт темым, проблемым у семын почыт, камер ончылно шкем кучаш, ваш-ваш колышташ, пашам ышташ тунемыт. А сеҥымаш кумылым нӧлта, умбакыжат конкурслаште шке вийым тергаш шонымаш лектеш.
Чынжымак, сеҥымаш-влак шӱм-чоннам ырыктат. Ончыкыжымат йоча-влак дене пашам ышташ кумылда лийже.
Эльвира Терентьева.
Школ архив гыч налме фото-влак.