Морко посёлкышто шочын-кушшо Дарья Юрьева изинек чолга кушкын. Койыш шоктышыжын ты ойыртемже ӱдырлан ончыкылык профессийым ойырен налмаште полшен. Тений Дарья Национальный сымыктыш гимназийым тунем пытарен. А икымше сентябрь гыч Панлантай лӱмеш колледжын студентше-влак радамыш ушна, тудо актёр профессийлан тунемаш тӱҥалеш.
– Визымше класс марте шке посёлкысо школышто тунемынам. А вара Йошкар-Олаш мурызылан тунемаш каяш шонен пыштенам. Лач тудо ийын Сымыктыш гимназийыште театральный класс почылто. Актёр муренат, куштенат моштышаш, шке вием терген ончышаш манын шонен, ты специальность пӧлкаш тунемаш пураш тергымашым эртышым. Мыйым нальыч.
Колледжыштат экзамен нелылык деч посна эртыш. Басньым, прозым лудым, мурым мурышым. Актёр профессий шкешотан, актёрын кажне паша кечыже ойыртемалтеш. Офисыште але вес вере пашам ыштыме гай огыл: эрдене толын, кас марте паша верыште шинчыме гай огыл, – манеш Д.Юрьева.
Ӱдырын чолгалыкше ача-аваж деч куснен, тудын аваже шке жапыштыже ансамбльыш кушташ коштын, почеламут-влакымат возкален. Ачажат чолга. Юрьевмыт ешыште вич икшыве кушкеш, Дарья – эн кугужо. Нуно чылан тӱрлӧ койыш шоктышан улыт гынат, ача-авашт деч чолгалык кажныжлан куснен.
Тений кеҥежым Дарья Марий самырык тукым слётын участникше лийын. Слёт нерген тудо теве мом каласкалыш:
– Слёт Кужэҥер районышто эртаралтеш манын пален нальымат, утларак куанышым, вет мыйын ачам ты кундемыште, Старсела ялыште, шочын. Изирак улмем годым ковам дек уналыкеш чӱчкыдынрак коштына ыле, пытартыш жапыште Кужэҥер районышто шуэнрак лияш логалын. Слётым официально почмо кечын мыланна экскурсийым эртарышт. Ты кундемын сӧрал верлажым куанен да кугешнен ончен коштым. Могай мотор верыште ачам шочын-кушкын!
Кеҥежын пытартыш кечылажым Дарья ешыж дене эртара. Тудлан шӱжарже-влак да шольыж дене лияш, иктаж сомылым пырля ышташ келша. Юрьевмыт пӱртӱс лоҥгаште чӱчкыдын канат. Чулым да чолга Дарьялан ойырен налме корныштыжо кугу кӱкшытым да пиалан студент пагытым тыланена!
Д.Юрьеван альбомжо гыч налме фото.