Крымысе «Артек» тӱнямбал йоча рӱдерыште Марий Эл Республикын кечыже лийын. Тудым «Артекыште» эртарымаш икмыняр пайрем дене кылдалтын: «Артеклан» – 100 ий, Марий Эллан – 105 ий, Кугу Сеҥымашлан – 80 ий.
Тидын лӱмеш рӱдерын «Морской» йоча лагерьыштыже пайремле линейке годым кундемнан флагшым нӧлталме. Йоча-шамычлан оҥай да поян программе темлалтын. Нуно тӱрлӧ меропрятийыште Марий Элнан тӱвыраж дене палыме лийыныт.
Теве 12 интерактивный площадкыште республикнан историйже, национальный йылмыже, йӱлаже да кызытсе жапысе сеҥымашла дене палдареныт. Мастер-класслаште марий калыкын ик эн тошто семӱзгарже – кӱсле – дене шокташ, кидпашам ышташ, куэ кумыжым арверлан ямдылаш, марий узорым тӱрлаш, курчакым ышташ туныктеныт. Кидпашалан кумылан ӱдыр-рвезе-шамыч шкешотан национальный сувениран лийыныт.
Тылеч посна Марий Элын мотор вершӧрлаж да пӱртӱсыштӧ канымаш дене палдарыше презентаций-влак эртаралтыныт.
Марий Элым Вуйлатыше Юрий Зайцев «Артекыште» Марий Эл гыч канаш мийыше икшыве-шамыч дене вашлийын. Кажне ийын ты лагерьыште Марий кундем гыч 140 наре йоча кана да шуаралтеш.
– Те моло деч сайын паледа, вет «Артекыш» логалаш – кугу чап. Йочам годым, чаманем, тыште лийын омыл. «Артек» – элнан кугу историйже. Лагерьым неле граждан сар деч вара совет жапыште ыштеныт гынат, кугыжаныш икшыве-влак верч азапланен да сӧрал верым организоватлен. Крым верч эре кредалыныт. Но тудо эре мемнан лийын да нигунам весылан пуэн огынал. Сандене символ семынак «Артекын» 100 ий темме идалыкыште тыште вашлийына, – ойлен Юрий Зайцев.
Регионым вуйлатышылан экскурсийым эртареныт. Тыгодым «Прометей и дети мира» монументым, Саманта Смитлан памятникым, икымше линейкым шарныме верым, капитан кӱварым да молымат ончыктеныт.
Ты кечым «Артек» йоча рӱдерыште «Сеҥымашын кӱслеже» пайремле концерт дене мучашлыме. Сценыште «Марий Эл» кугыжаныш ансамбль, кӱслезе-влакын «Чинчывий» коллективышт, Э.Сапаев лӱмеш опер да балет театрын солистше-влак, «Тулгайык» калык муро ансамбль да моло талантан артистат выступатленыт.