12-14 августышто Моско областьысе «Патриот» конгрессно-выставочный рӱдерыште «Армия-2024» форум эртаралтеш.
Тыште выставочный экспозицийлан 340 тӱжем утла квадратный метр вер ойыралтын. Тушто вооруженийын, тӱрлӧ техникын да спецтехникын 240 утла позиций ончыкталтын.
Чылаже 100 наре мероприятий лиеш. Тушто у технологий, робототехнике, искусственный интеллект, пилотдымо юж системе, СВО участник-влакын реабилитацийышт, военнослужащий-влакын боевой экипировкышт да моло йодышымат каҥашат.
Тушто Марий Элысе «МЕТМА» заводын, «Экспломет», «Неон+», «Мета-хром», «Интерколд», «Санда-М», «Эворус», «Ната-инфо» компаний-влакын сатушт ончыкталтыт. Форумыш Марий Элысе экономикым вияҥдыме министрын пашажым жаплан шуктышо Владимир Халюзин ушнен. Ты форум луымшо гана эртаралтеш.