1 апрельыште шошо призыв тӱҥалын. Ты гана Марий Эл гыч 800 наре еҥ порысым шукташ кайышаш. Республикын сборный пунктшо гыч призывник-влакым май мучаште наҥгаяш тӱҥалыт. Шошо призыв нерген Марий Эл Республикын военный комиссарже полковник Юрий Аксёнов каласкален.
Спецоперацийыш огыт ушно
24 февральыште Россий Президент В.Путин Украиныште специальный военный операцийым тӱҥалме нерген увертарен. Садлан призывник-влакын ача-аваштым ик эн тӱҥ йодыш тургыжландара: эргыштым тушко колтен кертыт мо?
Донецк да Луганск Калык Республик-влакым утарыме специальный военный операцийым эртарымашке призывник-влакым огыт колто. «Спецоперацийыште профессионал военнослужащий-влак гына участвоватлат – офицер ден контрактым подписатлыше военнослужащий-шамыч», – ойлен Марий Элын военкомжо.
Отсрочко пуалтеш
Тений призыв годым отсрочкым налме шотышто икмыняр вашталтышым пуртымо. Рвезе кӱшыл шинчымашан да призыв тӱҥалме жаплан 11 тылзе наре IT-компанийыште пашам ышта гын, отсрочкым налын кертеш. Университетым тунем пытарымеке, ик ий жапыште пашам ышташ тӱҥалме нерген договорым подписатлен гын, рвезылан тыгак отсрочкым пуэн сеҥат.
Эше ик вашталтыш – тений 1 январь гыч военкоматын направленийже почеш водительский военно-учётный специальность-влаклан подготовкым эртыше еҥ водительский удостоверенийым налмылан кугыжаныш пошлиным тӱлышаш огыл.
Ондален кертыт
Соцкыллаште Украинысе событий-влак нерген тӱрлым возкалат. Еҥ-влаклан телефоныш йыҥгыртен, военкоматыш каяш да спецопераций дене кылдалтше службым эрташ йодыт.
«Чыла тиде – шоя. Тыгай случай-влакым телефонный терроризмлан шотлаш лиеш», – ойлен Ю.Аксёнов. Тыгай годым илыме вер почеш военкоматыш кайыман да йодышым рашемдыман.