Армийлан йöрышö лийман

Калыкын ойжо – виян, келге шонымашан, юзо куатан. Кугурак-влакын мутышт ожнысек кÿкшын аклалтын. Икшыве-шамыч акрет годсек, ача-аваштым, коча-коваштым колыштын, илышым умылаш тунемыныт да уш-акылым погеныт. Морко район Изи Корамас ялыште шочын-кушшо Павел Титов дене мутланымеке, шканем эше ик гана тыгай иктешлымашым ыштышым.

– Мый изинек ачам да ковам деч тыгай ойым колынам: «Армийлан йöрышö лийман». Айдеме армийлан йöрыдымö гын, тиде намыс манын умыленам. Тыгай шонымаш ушем гыч лектын огыл. Сандене спортым йöратенам, таза лияш тыршенам. Таза лият – тугеже армийлан йöрет. Армийлан йöрет гын, тале айдеме да чын пöръеҥ кушкат… Ты шонымаш дене мый моткоч келшем, – каласкала П.Титов.

Павел Арын кыдалаш школым тунем пытарен, вара Йошкар-Оласе аграрный колледжыште техник-механиклан тунемын. 2012 ийыште армийыш каен, Угарман кундем Дзержинск оласе эл кöргö войскаште срочный службым ик ий эртен. Службо деч вара шочмо кундемыште пел ий лиймеке, рвезылан военкомат гыч ÿжмаш толын. Тудлан Таджикистан элыш контракт почеш службым эрташ каяш темленыт. Павел келшен, йот кундемыште элым аралыме сомылым шукташ тÿҥалын. «Мо дене военный паша сымыстарен?» манме йодышлан рвезе тыгерак вашештыш:

– Икымше – мылам армийысе илыш радам моткоч келшен, садлан уэш тиде пашаш ушнымем шуын. Кö салтакыште лийын, тудо пала: тыште «боевое братство» манме умылымаш уло. Рвезе-влак ваш-ваш полшат, икте-весылан эҥертат. Тидын деч посна нигузе ок лий. Эҥертыш уке гын, служитленжат от керт. Ме тыште чылан ик еш семын илена.

Весе – военный паша тачысе илышыште шотанлан шотлалтеш, пашадарат уда огыл. Кумшо – мый спортым йöратем. А армийыште спорт деч посна ок лий. Ме тыште эре зачётым сдатлена, капкыл тазалыкым пеҥгыдемдена. Мый пауэрлифтинг (кугу нелытым нöлтылмаш) дене заниматлем. Куржталаш йöратем. Спорт деч посна ме уш-акылымат пойдарена, тидлан занятий-влак лиедат. Армийыште аҥыра-влак огыт служитле. Садлан шке пашам нерген мый эре кугешнен ойлем.

Тыгай лийман

Павел Титов мыланна капкыл тазалык да уш-акыл нерген веле огыл, тыгак айдемын койыш-шоктышыж нергенат каласкалыш. Вет физически виян лий веле, чытымаш да шкем кучен моштымо шотет уке гын, армийыште гына огыл, илышыштыжат неле.

– Тыште айдемылан чыла шотыштат таза лийман: капкыл денат, психологий велымат. Такшым армий рвезе-влакым пеҥгыде, чытыше лияш да шкем кучен мошташ туныкта. Тыште пунктуальность манмет вияҥеш. Кечым радам дене эртарет, жапым шот дене кучылтат. Тиде пашаче лияш тарата. Тÿнямбалне бизнесым виктарыше але вуйлатыме пашаште улшо ятыр еҥ кунам-гынат военный пашаште шуаралтын. Теве, кумдан палыме писатель, бизнесмен Роберт Кийосаки военный-влакын молан пашаче улмышт нерген книгамат возен. Икманаш, элым аралыме пашаште патыр, виян, пеҥгыде койыш-шоктышан еҥ-влак тыршат. Калык манмыла, тыгай-влак тул-вÿд вошт лÿдде эртен кертыт, –  умылтарыш Павел.

 Марий Эл – эн сылне

Ятыр жап вес кундемыште илыше рвезе кажне ийын каныш жаплан шочмо кундемышкыже толын кая. Курыкан шокшо Таджикистан ден чодыран тöр Марий Элнам таҥасатараш йодмылан Павел тыге вашештыш:

– Тора кундемыште лийын ончымеке веле шочмо верын ямжым шижат. Мутат уке, кушто шочынат, тушто шудыжат ужаргырак, олмажат тамлырак, каважат кандырак… Но Марий кундемын пÿртÿсшö эн чот сылне. Тынар чодыра, пушеҥге, эҥер, емыж-саска, поҥго! Таджикистаныште тыгай куан уке. Тыште 90% курык. Шочмо верыш миемат, фотом ыштылам. Фотошто нимогай тöрлымашым ышташ ок кÿл – чылажат йомакысе гай сылнын лектеш!

Паша верыштем Россий гыч шукын улыт. Кö Марий Элыште лийын, чыланат пÿртÿс моторлык нерген веле огыл, калыкнан поро кумылан да пашаче койышыж нерген ойлат. Тидыже кö да кушеч улмем дене кугешнаш тарата.

Павелын фотожо: Изи Корамасыште…

 

Павел Титов – тыглай марий рвезе. Но тудын ойыштыжо тынар келге шонымаш, тынар волгыдо кумыл. Кызыт Павел Волгатехыште «Уголовное право» специальность почеш заочно шинчымашым пога, ончыкыжым журналистлан тунемаш шонымашыже уло. Яра жапыште фото ден видео-влакым ыштылеш, почеламутым воза. Но тачеш тудо тора кундемыште эл ончылно пуымо мутшым куча. Кызытеш йöратыме Марий кундемже шке шочшыжын таза капкыланак, пÿсö уш-акыланак пöртылмыжым вучен кодеш…