Марий Турек район Арбор кундем гыч индеш ияш Ростислав Васинкинын кидыште гармонь модеш гына! Могай сем кӱлеш – тугайым шоктен пуа, тыгодым сылнын муралта. «Тиде Арбор вел» мурым гармонь почеш шоктен мурымыжым интернетыштат ужаш лиеш.
Тений шошым тудо Марий самырык театрыште эртыше «Изи гармоньчо» фестивальыш ушнен, Йошкар-Олаште эртыше Пеледыш пайремыште гармоньчо-влакын фестивальыштышт икымше гана шоктен.
Ныл ияш годсек шокта
Лоп ялыште илыше Васинкинмыт кум шочшым ончен куштат, Ростислав – кокымшо икшыве. Светлана Вячеславовна йочасадыште воспитательлан ышта, пелашыже Андрей Андрианович – инвалид, шоҥгыеҥ-влакын Карлыганысе интернат-пӧртыштӧ охраныште тырша.
Ростислав йочасад годсек гармоньлан шӱман кушкын, тӱрлӧ марий семым куштылгын налын мошта. Йорга Качын, Михаил Веселовын да Александр Марковын мурыштым шокташ йӧрата. Юра Шатуновын «Белые розы» мурыжым сайын шоктен мура. Рвезе музыкальный школыш коштын огыл, чыла шкеак шокташ тунемын. Арбор кундемыште тудо шкетын тыгай.
Ростиславым республикысе тӱрлӧ мероприятийыш ӱжыт. Тений Марий ёлкышто, 1 июньышто Ленин лӱмеш тӱвыра полатыште Йоча-влакым аралыме кече лӱмеш эртыше мероприятийыште лийын, Йорга Качын сольный концертыштыже мурызо дене пырля шоктен мурен.
– Тукымыштем гармоньчо-влак лийыныт. Ростиславын кочаже, чӱчӱжӧ сайын шоктен моштеныт. Кум ияш улмыж годым эргым икымше гана гармоньым кидыш кучен, ныл ияш шокташ тӱҥалын. Икымше гармоньым мый налын пуэнам, кокымшым – коваже, а кумшым – ачаже.
Кандаш ияшыж годым сценыш лекташ тӱҥалын. Эн ондак тудо Арбор клубышто выступатлен. Ӱмаште Морко район Чопак ял пайремыште калыкым куандарен. Тыгак Киров область Вӱрзым кундемыште «Шокталте, гармонь» фестивальыште лийын, – мане аваже Светлана Васинкина.
100 утла медальже гына
Рвезе эше тале спортсмен: писын куржталеш, ече дене коштеш, туризм дене заниматла. Ты мастарлык ачаж деч куснен. Тудо тачат спорт дене пеҥгыде кылым куча.
Арбор школын чапшым Ростислав тӱрлӧ таҥасымашыште нӧлта. Тудын 100 утла шӧртньӧ, ший, бронзо медальже-влак улыт, тыгак ятыр чапкагазше погынен.
Ты рвезе Арбор кундемым чапландара, мастарлыкше дене куандара. Ростислав кунам-гынат кумдан палыме да тале гармоньчо лӱмым налеш манын ӱшанена.