Кызыт энергийым аныклыме нерген шуко ойлат. Бытовой прибор-влакын этикеткыштышт буква-влак возалтыныт. Мом нуно ончыктат?
СВЕТЛАНА. Медведево район. Роспотребназорын Марий Эл Республикысе управленийжын пресс-службыжо умылтара:
– Мыняр электровийым аныклымым ончыктышо шым класс: А гыч G марте – уло. А классан оборудований энергийым эн чот аныкла гын, G классан – эн удан. Этикеткыште А класс (тышке А+, А++, А+++ пурат) манын возалтын гын, тыгай приборлан стандартный режим деч 45 процентлан шагалрак электроэнергий кӱлеш. Ты тӱшкашке эн шагал энергийым йодшо прибор-влак пурат. Нуно 15 ий марте пашам ыштен кертыт. В классан прибор электровийым 25 процентлан шагалрак «кочкеш», а С класслан – 5 процентлан шагалрак. Тыгай прибор-влак энергийым аныклат, но изирак куатан улыт. D, Е классан прибор-влак 100 да 110 процент электричествым «кочкыт». Нуно этикеткыште нарынче тӱс дене ончыкталтыт, тидыже энергийым аныклыме кокла кугытым ончыкта. F, G классан технике электричествым 25 процентлан шукырак «шупшеш».