Марий Элын 100 ияш лӱмгечыжлан пӧлеклалтше «Тывырдык» регион-влак кокласе марий куштымаш конкурсыш 34 участник ушнен. Тудым 22-24 октябрьыште онлайн йӧн дене Марий Эл Республикысе калык усталык да культур каныш паша шотышто шанче-методик рӱдер эртарыш.
«Тывырдыкын» лауреатше
Конкурсышто 28 ансамбль лауреат лийын. Нунылан лишыл жапыште дипломым кучыктат. Тылеч посна ансамбль-влакым кок ий гыч эртаралтшаш «Тывырдыкыш» ӱжмӧ. Лауреат-влак кокла гыч иктыже – Пошкырт кундем Нуриман район Тошто Педий ял гыч Асеевмытын еш ансамбльышт.
Тудым кок шочшан ача В.Я.Асеев 2013 ийыште чумырен. Тидлан негызшат лийын. Владимир Яковлевич 1990-1995 ийлаште Тошто Педий тӱвыра пӧртым вуйлатен. Зоотехник образованиян еҥ кушташ-мураш йӧратен, эше директор сомылым шукташ тӱҥалме годымак 1990 ийыште ялыштыже самодеятельный коллективым чумырен. Кызыт участник-влак «Чимари» лӱм дене выступатлат. Владимир Яковлевич тӱвыра паша гыч кайымекыже тӱрлӧ вере пашам ыштен гынат, икмыняр жап «Чимари» ансамбльыш коштын, шӱм-чонжо дене ты аланыште илен. Варажым шке еш, родо-тукым дене пырля еш ансамбльым ышташ кутырен келшеныт. А кок ий гыч, 2015 ийыште, ты коллективлан калык лӱмым пуэныт!
Йоча, иза-шольо, шешке…
Владимир Асеевын кок йочажат – Алина ден Вадим – ансамбльыш тудым почмо годсек коштыт. Гульфира пелашыже – татар калыкын ӱдыржӧ. Лачак тудо марла мурен-куштен ок мошто. Владимир Яковлевич ансамбльым вуйлата веле огыл, куштымаш-влакымат шкеак шында. Аккомпаниатор сомылым Изибай Изиланович Мусин шукта.
Ансамбльыш чылаже 12 участник коштеш. Нунын коклаште школышто тунемше, студент, пашам ыштыше да пенсионер-влак улыт. Лӱмышт денак каласен кодена – Г.Акбердина, В.Сабитова, Е.Асеева, А.Питаев, А.Питаева, Л.Алынбаева, Е.Андреева, А.Салеева. Ийгот дене ончалаш гын, эн кугу участниклан 74 ий темын, а эн изижлан – 12 ий.
Кушто выступатленыт?
Ансамбльын икымше выступленийже 2013 ийыште «Ший кандыра» регион-влак кокласе фестиваль-конкурсышто лийын. Тунам сценыш Алина, Вадим да Владимир Асеевмыт лектыныт да кумшо степенян лауреат лийыныт. Коллективын репертуарже моткоч поян да марий калыкын койышыжым, илышыжым ончыктышо. Кажне гаяк «Мужырым кычалам», «Вашлиймаш», «Савуш ден марлан кайыше ӱдыр» куштымашыштым ужаш лиеш. Тыгак яндар йӱкышт дене сӱан такмак-влакым муралтат, армийыш ужатыме сценкым, шергашым пуэден модмым оҥайын ончыктат.
2014 ийыште коллектив Йошкар-Олаште Пеледыш пайремыште шке мастарлыкшым ончыктен. Тыгак тудо Калтаса селаште эртаралтше «Ший кандыра» конкурс-фестивальыште вич ий почела участвоватлен. Пытартыш жапыште «Душа просит танца» фестиваль-конкурсышто (Мишкан селаште лийше), фольклор фестивальыште (Кушнаренково села), «Шежере байрамы» пайрем годым эртаралтше «Семья – моя крепость» усталык конкурсышто (Аскын села) выступатлен.
Пашам Алина шуя
Вате-марий Асеевмыт кочкыш кевытым кучат, амалкалче сомылым шуктат. Вадим еш ансамбльыште тӱмырым кыра. Тыгак тудо эше спортлан шӱман, 10 ияш годымак биатлон дене профессионально заниматлаш тӱҥалын. Тиде вид дене спорт мастерыш кандидат. Тений рвезе Стерлитамакыште физический культур, управлений да сервис колледжым тунем лектын. Кызыт армийыште, Рязаньысе военный юж войскаште служитла
Алина ӱдырышт кок кӱшыл шинчымашым налын. Тудо Пошкырт кугыжаныш аграрный университетыште инженер-экологлан тунем лектын. Вара «Государственное муниципальное управление» специальностьлан заочно тунемын. Ик жап Уфа олаште Ленинский районысо администрацийыште пашам ыштен. А 2019 ийыште марлан лектын. Пелашыже полицийыште пашам ышта, кызыт Чечняште служитла.
Кызыт Алина Владимировна Нуриман районысо Пионер ден тунемше-влакын пӧртыштышт ешартыш шинчымашым пуышо педагоглан пашам ышта. Тудо Тошто Педий школышто кушташ туныкта, тыгак «Сценическая речь» кружокым эртара. Ты школышто Асеевмыт 2016 ийыштак йоча-влаклан куштымо кружокым почыныт. Тушто икшыве-шамычым, ийгот дене пайлен, кум тӱшкам ыштыме, ансамбльыштлан «Ӱжара» лӱмым пуымо.
Асеевмыт семын марий калык куштымашым туныктымо пашам шуйышо йоча ешыштак кушшаш. Тыгай энтузиаст-влаклан кӧра тӱвырана ик курым гыч весыш куснен толеш.