Самырык художник Анна Санникован пашаже-влакым ынде икмыняр ий эскерем. Тудо шке картиныже-влакым пытартыш ныл ийыште «Марийский край» ончерыште чулымын ончыкта. Ты ганат художниклан уло мом темлаш! Марий Элыште илыше сӱретче шке радыналаштыже илыме вершӧржын, уло кундемжын сылнылыкшым, тусо калыкын ойыртемжым ончыкташ тырша.
Тылеч посна Россий художник ушемын Марий Элысе пӧлкаже А.Санникован «Илыш книга» циклжым Олык Ипай лӱмеш кугыжаныш молодёжный премийлан темлен. Тудым Анна 2016-2018 ийлаште сӱретлен.
Чиям «аклен» кушкын
Анна изиж годсек сымыктыш тӱням ужын кушкын. Ачаже – кундемыштына палыме сӱретче, Марий Элын сулло художникше Андрей Санников. Аваже Елена Анатольевна Йошкар-Оласе йоча художественный школышто «Декоративно-прикладной искусство» предметым туныкта. Шӱм-чон кумылжылан ава шкежат тӱрлӧ кидпашам шукта: пытартыш жапыште межым малтен, тӱрлӧ настам ыштылеш, тылеч ончыч йӧратыме пашаже порсынышто роспись лийын.
Ачаж могырым Юрий кочажат творческий еҥ улмаш. Кеч профессионал-влак радамыште шоген огыл гынат, коча пушеҥге вож гыч тӱрлӧ арверым ыштылын.
Аннан ачаже эрыкан художник семын шке пашажым шуктен, аваже ӱдыржылан кагаз гыч курчак-влакым сӱретлылын, моло оҥай кидпашам темлен – чыла тидым Анна шымлен ончен, санденак сымыктыш тӱням ойырен налын. А тӱҥалтыш класслаште тудо музыкальный школышко куржталыштын, эн ончыч кидыш скрипкым налын, ты семӱзгар келшен огылат, фортепиано дене шокташ тунемын. Но кум ий деч вара тиддечат кораҥын да Йоча художественный школышко корным такыртен.
Живописьыш – корно
Марий калык нерген
Тӱрлӧ вере терга
Художник картиным ужален гына шийвундан огеш лий, сандене тудлан ятыр сомылым кычалаш перна. Пытартыш жапыште компьютерный графике модыш пурен. Ты стиль дене А.Санникова «Звезда» телеканал дене пашам ышта. Ынде нылымше ий тудо «Не факт» передачылан Российын историйже нерген иллюстраций-влакым ямдыла.
ИКМАНАШ, ойыртемалтше сӱретче Анна Санникова нерген 2020 ий 23 октябрьысе «КУГАРНЯ» газетыште лудса.