
Анфиса Петрова Татарстан Республикысе Арск район Шорамучаш ялыште шочын-кушкын. Кызыт Ямал кундемыште Тарко-Сале олаште ила, йочасадыште воспитательлан ышта. Тудлан тыгай лӱмым ачаже пуэн. Тидын нерген Анфиса тыге каласкала:
– Ачам школышто 7-8-ше класслаште тунеммыж годым кугу экран дене «Течёт Угрюм река» кином ончен. Тӱҥ героине – Анфиса лӱман ӱдыр. Тудо ачамлан чот келшен да шкаланже каласен: «Кушкын шумекем, ешан лиям, ӱдырем шочешат, тудлан Анфиса лӱмым пуэм». Тыге киносо актрисе гай Анфиса лӱман улам. Актрисе кужу ӱпан, садлан ачам ӱпем нигунам пӱчкаш кӱштен огыл, кызытат кужу ӱпан улам.
Тиде кином кок-кум ий ончыч веле шкежат лӱмын онченам. Тӱҥ героине мыланемат чонешем пижын. Лӱмемат шканем пеш келша.
Ачам, Александр, чыла вич йочажлан А буква дене тӱҥалше лӱмым пуэн: Анфиса, Алексей, Ангелина, Артём, Александр улына. Алёша лӱмым изи годсо йолташыже пуаш темлен, ачам Руслан манын лӱмдынеже улмаш. Ангелинам – телевӱдышӧ Ангелина Вовк лӱмеш. Артёмым молан тыге лӱмден – ом пале. А Александрже… Шольым шочмеке, авам икмыняр киндым коҥгаш пыштен, кажнылан лӱмым пуэн. Александр манме киндыже эн сайын кӱын лектын. Тыге шольым Александр лӱман лийын.
Анфисан Владимир пелашыжынат лӱмжӧ шотышто историй оҥай. «Тудын ача-аваже пӧртым чоҥеныт, посна лектыныт. А коҥга опташ Владимир лӱман сай родыштым ӱжыныт. Лач тудо жапыште пелашем шочын. Саде пӧръеҥ эргыланда Владимир лӱмым пуыза, уке гын коҥгам луктын ом пытаре, манын», – ойла Анфиса.
Вате-марийын ешыште кум икшыве кушкеш: Ангелина, Валерия, Дима. Ӱдыр-влаклан лӱмым шке кычалыныт гын, эргылан нуно пуэныт, палемда А.Петрова.
Еш альбом гыч налме фото.