
2023 ийыште шыжым «Защитники Отечества» фондын Марий Элысе филиалже пелен «Сильные духом» паралимпиец-влак командым ыштыме. Тушко СВО гыч сусырген толшо, инвалидностян герой-влакым чумырымо. Спортсмен-влакын историйышт дене фондын ВК-се тӱшкаштыже палдарат. Шукерте огыл Йошкар-Ола гыч специальный военный операцийын ветеранже Андрей Бусыгин нерген каласкаленыт.
Латкандаш ийым темыше рвезе, школысо аттестатым вучен шуктыдеак, армийыш каен. 2015-2016 ийлаште Балтийский флотышто служитлен. Вара Российын армийже дене контрактым пеҥгыдемден, Таджикистан Республикыш командировкыш колтеныт.
2022 ийыште шыжым шке кумылын СВО-ш ушнен. «Вагнер» подразделенийын составыштыже артиллерист лийын. 2023 ий 25 январьыште нелын сусырген. Тушман ваштареш лӱддымын кредалмыжлан А.Бусыгиным Патырлык орден дене палемденыт.
Ветеран спорт дене пеҥгыде кылым куча, поснак ияш йӧрата. 2024 ийыште СВО-н ветеранже-шамычлан эртаралтше таҥасымашлаште вийжым терген. Сай лектышым ончыктен. Тений шошым Озаҥ олаште «СВОих» кубок верч таҥасымашыште лу эн тале-влак радамыш логалын. Андрей тушто шымше лийын.
Бусыгинын кугу вий-куатан улмыжо – чылалан пример. Лач тыгай койыш-шоктышан еҥ-шамычлан кӧра кеч-могай тӧрсырым чактараш, шонымашке шуаш, неле ситуаций-влакым эрташ, тушманым лӱдыкташ лиеш. Садлан ме нунын нерген палышаш да шарнышаш улына. Салтак-шамычын примерышт лӱддымын ончыко каяш кумылаҥда!
Марий Элысе «Защитники Отечества» фондын ВК0се тӱшкаж гыч налме фото-влак.