Кужэҥер район Лажмучаш ялыште шочшо да кызыт Америкыште илыше Эльвира Гамильтонлан (Попова) Пӱртӱс-Ава вӱд гаяк яндар йӱкым пуэн. Кутыралтен колта але муралта гын, эре колыштмо шуэш…
Шукерте огыл «Миллион алых роз» марлаҥдыме мурым студийыште возен да шке каналыштыже, соцкылыштыже вераҥден. Тудо «Миллион локама» маналтеш, Светлана Григорьева кусарен.
Тылеч посна марий ӱдырамаш 2020 ий ноябрь годсек Америкыште кушто лиймыж нерген Ютубышто шке каналыштыже каласкала да ончыкта. Тушто 318 подписчикше уло.
Америкыште тудым Элвайра лӱмдат. Ты лӱм тусо мурызо Ричард Стербанын мурымыжлан кӧра кумдан палымыш савырнен. Эльвира тудын денат вашлийын да сниматлалтын.
А шукерте огыл землячкына ик кинофильмыште кӱчен шинчыше нужна ӱдырамашым модын, тушто баяным шоктен.
Эльвира кызыт англичанлат, марлат сайын мутлана. Шочмо кундем гыч Америкыш наҥгайыме арверже-влак шӱм-чонжым куандарат.
Тиде фотошто Флорида штатыште Медикейдыште пырля ыштыше Спенсер Мор дене пырля. Варажым Спенсер черланен, паша гыч каен, а Эльвира туддеке эмлымверышкат, мӧҥгышкыжат полшаш коштын.
