Эн ондак мом шотыш налман?
«Фонд поддержки предпринимательства Республики Марий Эл» микрокредит компанийын предпринимательстве шотышто полшышо рӱдерын вуйлатышыже Гузалья Рауисовна САБИРЬЯНОВА вашмутым пуа.
– Бизнесым почаш шонышылан мом палыман?
– Предприниматель-влак эн ондак тыгай нелылык дене вашлийыт: шонымаш уло, а кузе тудым илышыш пурташ – огыт пале. Тидлан кӧра шке идейда деч ида кораҥ, тунемза, рашемдыза, йодыштса. Мом ыштен кертмыда нерген шонкалыза, конкурент-влакым шымлен лекса. Опытан амалкалче-влак деч каҥашым йодса. Могай риск лийын кертмым шотыш налза. Кажне ошкылдам возыза, ик пункт почеш весым ыштыза. Мемнан рӱдерыштына тӱҥалше бизнесъеҥ-влаклан оксам тӱлыде консультацийым налаш лиеш. Тыланда кӱкшӧ квалификациян еҥ-влак, кузе бизнесым тӱҥалаш, каласкалат. Шке бизнесым почмо годым тӱрлӧ нелылык лектеш. Тыгодым кажныже шкешотан. Чыла палаш да шарнен кодаш огеш лий, но ситуаций гыч лектын мошташ ямде лийман. Илыш ончыко писын кайымылан кӧра чыла вашталтеш: документ, сату, налше-влакын йодмашышт. Тидым шотыш налын, чыла вискален, шонен ыштыман.
– Могай аланыште бизнесым почаш сайрак?
– Чылажат тендан кумылда да мом ыштен моштымыда гыч лектеш. Тыгак бизнес-рынкыште йол ӱмбалне пеҥгыдын шоген кертмым да конкурент-влакым шотыш налман.
– Айдемын кумылжо уло, а идейже уке гын?..
– Тыгай годым мемнан рӱдерыште полшен кертыт. Физический лица-влаклан «Бизнес-старт» школна уло. Интернетыште шым модуль дене туныктат. Тыгак мӧҥгысӧ пашам пуэна. Занятий-влаклан оксам тӱлыман огыл.
– Эпидемийлан кӧра шуко амалкалче неле ситуацийыш логалын. Полышым йодын толшо-влак лийыныт?
– Тиде неле жапыште «шокшо линийыш» 3000 утла йодмаш пурен. Изирак бизнес-влаклан полыш разработко-влакым ямдыленна. Тӱҥ шотышто микрозайм организаций-влак дене пашам ыштенна. Тыгак ик мессенджерыште Амалкалче-влаклан чатым ыштенна. Тушто йодыш-влаклан вашмутым пуэнна. Тиде чатыште республикысе 800 амалкалче уло.
Йодышда уло гын, мойбизнес12.рф сайтыш ончалын кертыда але йыҥгыртыза (8362) 34-19-54, 34-19-64.