17-18 сентябрьыште Марий Эл да Татарстан гыч делегаций-влак Алтайысе Змеиногорский район Черепановский посёлкышко Угинде пайремыш миеныт. Тидын нерген Марий тӱвыра рӱдерым вуйлатыше Наталья Пушкина тыгерак ойлыш:
– Инициаторжо – Российысе Марий калыкле тӱвыра федерал автономийым вуйлатыше Лариса Николаевна Яковлева. Алтайыште марий-влак Змеиногорский район Черепановский посёлкышто чумырген илат. Тушко нуно 1950-1960-шо ийлаште Татарстан Республике гыч илаш кусненыт. Ятыр марий мероприятийым эртарат.
Тушто илыше марий-влак «Алтай Мари» калыкле тӱвыра Марий автономийым, тыгак тоштерым почыныт. Кызыт марий культур рӱдерым ышташ шонат.