Марий Элыште ялозанлык кочкыш сатум ыштыше-влакын делегацийышт Алтай крайысе предприятийлашке миен коштыныт.
Тыште «Шойбулакский» (Медведево район), «Лукоз» (Шернур район), «Искра» (Кужэҥер район) да моло вӱдышӧ ялозанлыкла гычат лийыныт. Нуным Российыште производственный мощностян ойыртемалтше паша да ялозанлык техникын у образецше дене палдареныт.
Делегаций Барнаул оласе кум предприятийын пашажым эскерен. Эн ончычак «Штурман» заводышто шурным коштымо комплекс ден элеваторный оборудований производствым онченыт. Варажым мландым обрабатыватлыше техникым ямдылыше «Велес» заводышко каеныт. Тыгак комбинироватлыме ӱдымӧ комплексым да мландым обрабатыватлыше агрегатым ыштен лукшо «Фиат Агро» заводыш миеныт. Каласыман: республикысе ялозанлык-влак кумшо предприятийжын техникыж дене пайдаланат, сандене у темлымашышт дене палыме лийыныт.
Алтай кундемыште лийше ялозанлык специалист-влак производствын тичмаш циклжым – погымо деч тӱҥалын ямде продукций марте – ончен кертыныт. Тыге технологийын кӱкшытшым да качествыжым палемденыт.
А «Техно Снаб Агро» компанийын регионысо представительже Никита Братухинын мутшо почеш, производство дене палыме лиймаш, завод-изготовитель дене кылым кучымаш – ончыкылыклан пайдале да сай ошкыл.