Алтай крайыште марий пайремым  палемденыт

Российысе регионлаште: Москошто, Ленинград областьыште,  Пермь кундемыште да Киров областьыште «Пеледыш пайремым» эртареныт. Тений тиде марий йӱла пайрем Алтай край Змеиногорск районысо Черепановский селаште икымше гана лийын. Сибирь федерал округышто марий пайремым пайремлыме нерген увер Алтай крайысе правительстве сайтыште лектын.

Мероприятийыште марла муреныт, куштеныт, марий калык модыш-влак ден костюм  ончыкталтыныт. Черепанов лӱмеш каныме пӧртын «Изэҥер» марла куштышо коллективше пайремыш толшо-влакым «Кандыра» куштымашыш ушен. Пайрем тӱшкан куштымо дене пытен.

Тиде мероприятийым верысе марий-влакын Калыкле-тӱвыра «АлтайМари»  автономийышт (НКА) да тудын вуйлатышыже Т.А.Рябова эртареныт. 2021 ийыште Автономий областьын губернаторжын грантшым «Возвращение к истокам» проектше сеҥен налын. Тыгак тиде грант окса дене Змеиногорск кундемышке марий-влакын илаш куснымо нерген документальный кином войзаш оборудованийым, «Изэнер» ансамбльлан марий костьюмым налме.