Алсола Морко велын ик эн сӧрал верыштыже верланен. Йырымваш мотор пӱртӱс. Памаш йоген эрта. Но чоным кочо шӱлыш авалта. Вет кап кӱкшыт марте куштыра кушкын шогалын. Илыдыме тошто сурт-влак
йӧсланен ойганат.
Ялыште кевытат уке. Самырык-шамычшат кодын огытыл манме гаяк. А илалше еҥын тазалыкше чоным ок вӱчкӧ, шонымо семын ошкыл колташ йол коршта. Ял урем дене эртетат, икмыняр пӧрт окна гыч веле чурийвылыш койылалта.
Шукерте огыл Кораксола тӱвыра пӧртын пашаеҥже-влак Алсола ялыште илыше Татьяна Васильевна Афанасьева деке унала мийышна. Тудо ӱмыржӧ мучко «Авангард» колхозышто тыршен. Ятыр йӱштӧ-шокшым, шере-кочым чытен. Александр пелашыж дене кок икшывым ончен куштеныт. Елена ӱдырышт Курыкӱмбал ялыште ила, Володя эргышт – Морко посёлкышто. Татьяна Васильевна ондак пелаш деч посна кодын. А кызыт тудо Вячеслав Александрович Никифоров дене пырля шке илыш корныжым шуя. Пӧръеҥат уло ӱмыржым «Авангард» колхозлан пӧлеклен. Коктынат колхозышто сай пашаеҥ семын ойыртемалтыныт.
Мемнан кутырымашке Эрик Ухов ушныш. Ты поро чонан айдеме Татьяна Васильевна ден Вячеслав Александровичлан вӱдым нумалын пуа, моло сомылланат полшаш эреак ямде. Шке оралтыжым пеш арун куча. Суртшо йыр чыла шудым солымо, нимогай куштыра уке.
Татьяна Васильевнам Илалше-влакын кечышт дене саламлышна, пеледыш аршашым кучыктышна, а Вячеслав Александровичлан – шӱргышовычым. Кораксола ялын чолга мурызыжо-влак С.Н.Кириллова, Р.Н.Иванова, А.А.Силантьева Алсолашке пырля миеныт да шуко мурым суртоза-влаклан йоҥгалтарышт. Мый шкеже шиялтыш семым луктым, почеламутым лудым.
Тыге ме, Кораксола тӱвыра пӧрт пашаеҥ-влак, кажне ийын Алсолашке унала коштына. Татьяна Васильевна ден Вячеслав Александрович мемнам эре шокшын вашлийыт да мийымынам вучат. Таза да пиалан лийза, шергакан да лишыл еҥна-влак!
Елена Григорьева, Кораксола тӱвыра пӧрт вуйлатыше.
