Йошкар-Оласе Самырык-влак полатыште 30 январьыште «Профессионалы» чемпионатын регионысо этапыштыже сеҥыше ден призёр-шамычым палемденыт. Марий Элым Вуйлатыше Юрий Зайцев икмыняр компетенцийыште ончыл верым налше-шамычлан наградым шкеак кучыктен. Нунын коклаште – Торгово-технологический колледжын студенткыже Александра Пирогова (фотошто — пурла гыч кокымшо). Ӱдыр «Администрирование отеля» компетенцийыште икымше верым налын.
Посёлко гыч – олаш
Александра – Медведево район Силикатный посёлко гыч. Изаже да акаже деч вара ешыште кумшо икшыве. Ача-аваже верысе Силикатный кермыч заводышто тыршат.
– 9-ше класс деч вара Йошкар-Олаш Торгово-технологический техникумыш тунемаш пуренам. Турагентстве, отель-влакын пашашт нерген пален налаш эре оҥай лийын. Ола, студент илышлан пеш писынжак тунем шуын омыл. Кызыт кокымшо курсышто улам, ынде чылажат куштылгыракла чучеш.
«Профессионалы» чемпионатыште шкем тергаш лийме нерген Александрамытлан ӱмаштак ойленыт. Но тунам икымше курс ӱдыр-рвезе-шамыч эше тидлан «кӱын шуын огытыл» гай чучын. Ты тунемме курсышто туныктышышт К.Д.Салимова чемпионатыш ушнаш темлен. Александра тургыжланен гынат, келшен. Группышт гыч чылаже вич ӱдыр таҥасен. Чемпионатлан кӱлынак ямдылалтыныт: южо мужыр годым, тунемме деч варат. Колледж воктенак «Унавий» унагудо семын лӱмын келыштарыме верыш коштыныт да ресепшныште (унагудышто калыкым вашлийме вер) тӱрлӧ ситуацийым «модыныт».
Неле, но оҥай
– Чемпионатыште «Работа за ресепшном» да «Работа за компьютером» кок тӱрлӧ тергымашым эртыме. Отельыште унам вашлиймаш, тудлан номерым бронироватлымаш, варажым ужатымаш – чыла тидым рушла да англичанла эртыман ыле. Компьютер денат отельыште номерым бронироватлыме, вуйшиймашлан вашмутым пуымо шотышто да моло заданийым ыштыме – тыгак рушла да англичанла. Тӱжвал тӱсым посна критерий почеш акленыт. Формым чиенна: ош тувыр, юбко-карандаш, пинчак, галстук, 3-5 см таганан (кӱкшыракым ок лий) туфльо, ӱпым моторын погыман. Нелырак ыле, тургыжланенам. Наставникна Кристина Денисовналан тауштем, тудо полшен, кумылаҥден шоген.
Еҥ-влак тӱрлӧ лийыт: иктышт поро кумылан, весылан эре ала-мо ок келше. Чемпионатыштат ик ситуацийже «Конфликтный гость» ыле. Тыгай годым отель пашаеҥ шкем кузе кучышаш, тергеныт. Тӱҥжӧ шып шогаш огыл, иктаж полышым темлаш. Шкем тыматлын кучыман, вурседылмылан ласкан вашештыман, уналан йӧндымылыкым кондымылан иктаж-могай компенсацийым темлыман, – ойла А.Пирогова.
Александралан калык дене пашам ышташ келша. Ты паша неле, но тыгодымак оҥай манын палемда ӱдыр. Тыгак стресс годым шкем кучен моштыман, эмоцийлан шкем авалташ пуыман огыл, чытышанрак лийман, манеш. Да шуко шарнен кодман, тӱрлӧ ситуаций годым мом ышташ, сайын палыман.
Йылмым тунемеш, сӱретла
Александралан эше ик ий тунемаш кодеш. Колледжым йошкар диплом дене тунем пытарышаш. Тений кеҥеж каникуллан тудо Йошкар-Оласе ик отельыш пашаш пурынеже – туштак икымше практикым эртен, келшен.
Яра жапыште ӱдыр англичан йылмым репетитор дене онлайн тунемеш да сайын кутыра. Англичан йылмым школыштат сайын тунемын, ОГЭ-м «визытанлан» сдатлен. Колледж деч вара лингвистике направлений дене иктаж-могай кугу оласе вузыш тунемаш пурынеже. Тудлан Санкт-Петербург поснак келша. Тиде йылмым палыме ончыкыжым кӱлеш лиеш, манеш А.Пирогова. Вет тудо тӱрлӧ элым ужын кошташ шона.
Тыгак ӱдыр сӱретлаш йӧрата. Графический планшетшым кидыш налеш да тӱрлӧ сӱретым шочыкта.
А.Пирогован альбомжо гыч налме фото.